Lutfi Haziri: PDK s’është alternativë për bashkëqeverisje

Lidhja Demokratike e Kosovës nuk e sheh zgjidhjen tek partneriteti me Partinë Demokratike të Kosovës. Anëtari i kryesisë së LDK-së Lutfi Haziri duke folur në Info Magazine të Klan Kosovës tha se subjekti politik më i madh opozitar mbetet besnik i bllokut trepalësh.

“LDK kërkon alternativa jashta PDK-së për qeverisje. Ky është qëndrimi brenda partisë dhe unë nuk ndahem nga ata. Blloku ka konfirmuar unitetin dhe ne po shqyrtojmë tre opsione për ta menaxhuar krijimin e institucioneve. Se cilat janë këto opsione, do t’i shihni në vijim”, tha Haziri.

Haziri tha se Gjykata Kushtetuese me vendimin e saj nuk ka mbyllur të gjitha dyert për bllokun, ndonëse është përgjigjur në mënyrë rigjide siç ka kërkuar PDK-ja.

“Nuk janë mbyllur të gjitha dyert. Blloku po shqyrton tre opsione të ndryshme të cilat i kemi si alternativë. LDK do ta ketë kryeparlamentarin dhe ne sbëjmë kompromis me këtë. Nuk jemi futur në këtë rrugë për tu tërhequr”, tha kryetari i Gjilanit.

Ai tha se vetë PDK-ja nuk do të duhet të insistojë në zgjedhjen e kryetarit të Kuvendit.

“Nëse vazhdon të insistohet atëherë konfirmohet kapja e shtetit për fyti. Situata kërkon debllokim dhe PDK duhet të tërhiqet. Nuk duhet as të mendohet në korruptimin e deputetëve, për shkak se vetë mesazhi i kancelares gjermane Angela Merkel ishte i qartë për liderët e Ballkanit, se qytetarët janë të lodhur me korrupsion”, deklaroi anëtari i kryesisë së LDK-së.