Lutfi Haziri: LDK 113, besa që i qëndroi pranë Kosovës për 37 vjet

Gjilan – Në përmbyllje të aktiviteteve elektorale, kandidati për deputet dhe kryetari i Degës së LDK-së në Gjilan, Lutfi Haziri, ka përcjellë një mesazh mobilizues për qytetarët, bashkëveprimtarët dhe mërgatën, duke theksuar se fuqia e Lidhjes Demokratike të Kosovës nuk matet vetëm me individë, por me vizionin dhe rrugëtimin e saj shtetformues ndër dekada.

Haziri ka vënë theksin te numri 113 i LDK-së, duke e cilësuar atë si simbol të besimit, përkushtimit dhe partneritetit të ndërtuar me qytetarët përgjatë 37 viteve të angazhimit për liri, pavarësi, demokraci dhe ndërtimin e institucioneve të Republikës së Kosovës.

Sipas tij, LDK mbetet forca politike që ka qëndruar vazhdimisht pranë qytetarëve në momentet më të rëndësishme të historisë së vendit, duke kultivuar vlerat e dijes, përgjegjësisë dhe dashurisë për atdheun. Ai ka theksuar se kjo parti vazhdon të jetë shtëpia politike e shumë gjeneratave që besojnë në zhvillim, unitet dhe perspektivë evropiane për Kosovën.

“Nuk është me rëndësi vetëm numri 5 në listë, por numri 113, që përfaqëson një histori të gjatë besimi dhe pune të përbashkët për Republikën. LDK mbetet gjithmonë shtëpi e përbashkët dhe adresë e vlerave që e forcojnë shtetin”, ka theksuar Haziri.

Mesazhi i tij është pritur si thirrje për mobilizim dhe bashkim të elektoratit të LDK-së në Gjilan, Anamoravë dhe në gjithë Kosovën, me synimin që energjia qytetare të shndërrohet në mbështetje për vizionin e ri politik që partia synon ta jetësojë pas zgjedhjeve./rajonipress/