Lutfi Haziri: “Gjilani është lënë në harresë nga Qeveria, LDK mbetet shpresa për Kosovën”

Gjilan – Nënkryetari i Lidhja Demokratike e Kosovës, Lutfi Haziri, ka reaguar pas takimeve të zhvilluara në Gjilan dhe Anamoravë me liderët e partisë, duke theksuar se qytetarët po përballen me mungesë investimesh, përjashtim institucional dhe zhgënjim politik.

Përmes një postimi publik, Haziri tha se Gjilani dhe Anamorava mirëpritën kryetarin e LDK-së, Lumir Abdixhiku, dhe presidenten e Kosovës, Vjosa Osmani, ndërsa qytetarët shprehën hapur shqetësimet dhe kërkesat e tyre për të ardhmen e vendit.

“Na dëgjuan, na pyetën, kërkuan dhe, mbi të gjitha, i ndamë shqetësimet bashkë”, ka shkruar Haziri.

Ai ka kritikuar gjendjen politike dhe zhvillimore në Gjilan, duke deklaruar se kryeqendra e Anamoravës është lënë jashtë investimeve qeveritare dhe kujdesit institucional.

“Kosova po ecën nëpër terr politik, por Gjilani jo. Gjilani ka mbetur prapa edhe më keq – në një gropë politike”, është shprehur Haziri.

Sipas tij, mungesa e investimeve dhe neglizhenca institucionale kanë dëmtuar zhvillimin e rajonit, ndërsa ka shtuar se bashkimi qytetar dhe angazhimi politik janë rruga për rikthimin e besimit dhe shpresës në Kosovë.

Në fund, Haziri ka ritheksuar sloganin politik të LDK-së, duke e cilësuar partinë si “besë e shpresë për Kosovën”./rajonipress/