Lutfi Haziri bashkëbisedon me studentët e Universitetit të Zug të Zvicrës

Gjilan – Kryetari i Komunës së Gjilanit, Lutfi Haziri, ka pritur sot një grup prej studentëve të Universitetit të Zug të Zvicrës, të cilët i ka informuar për historikun e Gjilanit, traditat, bashkëjetesën mes komuniteteve, sistemin politik, dhe për sfidat e prioritetet që ka Gjilani dhe Kosova në përgjithësi.

Kreu i Gjilanit i është përgjigjur interesimeve të studentëve të pranishëm nga ky Universitet, teksa ka thënë se, në veçanti, kjo komunë është shembull i tolerancës dhe bashkëjetesës me të gjitha komunitetet.

Haziri i ka falënderuar studentët e Universitetit të Zug për vizitën, duke thënë se ndihet jashtëzakonisht mirë që studentët e Gjilanit dhe të Zvicrës do të kenë mundësi të mirë për të shkëmbyer përvoja mes vete.

“Ju falënderoj po vizitën dhe vërtetë jemi të gëzuar që studentët e dy universiteteve do të kenë mundësi për të shkëmbyer përvoja mes vete. Është i rëndësishëm fakti se 32 për qind e gjilanasve jetojnë në Europë dhe shumica në Zvicër. Pjesa më e madhe e tyre janë larguar në vitet 90’ta si pasojë e diskriminimit të ish-sistemit. Pra, një Gjilan i dytë jeton në shtetet e Europes. Gjilani është qendër universitare, kulturore dhe qendër e sportit. Jemi komunë multietnike e multireligjioze dhe për neve diversiteti në këtë aspekt është vlerë”, ka thënë, veç tjerash, Haziri.

Ai tha se ndihet krenar me sukseset e Universitetit “Kadri Zeka” në shumë aspekte, derisa theksoi se së bashku po punohet që kampusi universitar ta shohë dritën sa më shpejtë.

Në emër të Universitetit Publik “Kadri Zeka”, ka folur prorektori Dukagjin Leka, i cili e ka falënderuar kreun e Komunës për bashkëpunimin e mirë dhe mbështetjen e madhe që u ka ofruar në vazhdimësi.

Ndryshe, kjo është vizita e dytë që një grup i studentëve të Universitetit të Zug vizitojnë Gjilanin, pas atij të tetorit të vitit të kaluar./rajonipress/