Luta: Çdo fëmijë që lindë në Gjilan, lindë me 50 euro borxh shkaku i keqqeverisjes

Gjilan – Çdo fëmijë që lindë në Gjilan, lindë me 50 euro borxh shkaku i keqqeverisjes. Kështu ka thënë mbrëmë kandidati i Lidhjes Demokratike të Kosovës për kryetar të Gjilanit, Lutfi Haziri, para qindra mbështetësve në lagjen “Dardania”.

Kjo lagje, që është pa diskutim bastion i LDK-së, është harruar nga pushteti në largim, duke mos u bërë investime që nga viti 2007 kur ka qeverisur fryma rugoviane. E kryetari Haziri ka çka flet kur u drejtohet të pranishmëve të “Dardanisë”.

“Kush ka menduar dhe kush ka thënë që fryma e Rugovës nuk është në Gjilan, kanë gabuar. Dardania e konfirmon këtë. Dardania e ringjalli këtë frymë. Pikërisht në këtë lagje, Presidenti Ibrahim Rugova ka vendosur për himnin, në këtë lagje është organizuar arsimi, kultura, sporti. “Dardania” ka qenë dhe është bastion i Lidhjes Demokratike të Kosovës. LDK po përgatitet ta përmbyllë fushatën elektorale në stadium për shkak se sallat tashmë janë shumë të vogla për të na zënë të gjithëve”

Kryetari i ardhshëm i Gjilanit, është shprehur se gjilanasit, më 3 nëntor, nuk do të lejojnë më që të lëndohet demokracia nga ata që kanë abuzuar.

“Për 8 ditë, dhjetë herë i pari i qeverisë ka qenë në Gjilan. E ka bërë opozitë krejt Gjilanin sepse Gjilanin e ka kolapsuar, e ka zhytur në 7 milionë euro borxh, s’e ka ndërtuar lumin Mirusha, nuk ka kryer asnjë nga premtimet. As ato që po i premton nuk do t’i realizojë kurrë. Ne i themi nga “Dardania” se kurrë nuk do të mund ta lëndojë demokracinë në Gjilan. Njerëzit e Gjilanit i kanë shtëpitë këtu dhe ne nuk kemi nevojë për çadra të huaja”, është shprehur kryetari Haziri.

“Veteranët e arsimit vunë themelet e Universitetit të Gjilanit para 40 vjetëve”

Kreu i LDK-së në Gjilan ka falënderuar veteranët e arsimit që ishin prezent në këtë sallë për kontributin e dhënë, duke thënë se po këta njerëz janë ata që i vunë themelet e Universitetit të Gjilanit para 40 vjetëve, për të vazhduar me premtimet që në këtë lagje do të bëhen realitet.

Katër punët e para që do t’i kryejmë janë: asfaltimi i rrugëve, ujësjellësi, kanalizimi dhe ndriçimin publik, ndërsa për ta pasur më të lehtë të adresohen shqetësimet dhe nevojat, do ta themelojmë këshillin e lagjes “Dardania”. Drejtësia duhet të çohet në vend, dhe arroganca e pushtetit duhet të dënohet. Më 3 nëntor gjilanasit do t’i thonë lamtumirë arrogancës”, ka shtuar Haziri.

Të pranishëm në këtë tubim madhështor ishin edhe një delegacion nga Strasburgu, deputetet Vjosa Osmani-Sadriu e Lirije Kajtazi, veprimtari i njohur gjilanas Isa Maliqi dhe shumë personalitete të tjera të Lidhjes Demokratike të Kosovës.

“Lutfi Haziri ka fituar çdo betejë, do ta fitojë edhe garën më 3 nëntor”

Në fjalën e rastit, deputetja e LDK-së Vjosa Osmani-Sadriu, theksoi se Dardania kurrë nuk e ka tradhtuar vizionin rugovian që po e mbron fuqishëm Lutfi Haziri.

“Dardania kurrë nuk e ka tradhtuar vizionin rugovian që po e mbron fuqishëm Lutfi Haziri. Duhet ta votoni njeriun që e kishte besimin e presidentit Rugova që të udhëheq me pozitat më të larta të shtetit. Qytetarët e Gjilanit nuk e meritojnë të udhëhiqen nga këta njerëz që po e keqpërdorin paranë publike. Unë ju them se kur Lutfi Haziri thotë diçka, e mbanë fjalën. Ai ka fituar çdo betejë, do ta fitojë edhe garën më 3 nëntor. Jam e bindur se nuk do të keni nevojë me dalë për herë të dytë sepse zoti Haziri do të fitoj pa balotazh”, tha deputetja Vjosa Osmani-Sadriu thuhet në njoftimin e degës së LDK-së në Gjilan./rajonipress/