Lumezi kërkon të rishqyrtohet lënda ku dhunuesi i 15-vjeçares u dënua me vetëm 8 muaj burgim

Kryeprokurori i Shtetit Aleksandër Lumezi ka kërkuar nga kryeprokurori i Prokurorisë Themelore në Pejë, Agim Kurmehaj, që të rishqyrtojë lëndën e rastit, ku një mashkull u dënua me vetëm tetë muaj burgim për dhunimin e një 15-vjeçareje.

Lumezi po ashtu ka kërkuar që pas shqyrtimit të lëndës të merren edhe masa ndaj prokurore Lirije Morinës, e cila ishte pajtuar me lartësinë e këtij dënimi, pasi nuk ka ushtruar ankesë në Gjykatën e Apelit, transmeton Zeri.info.

“Kryeprokurori i Shtetit, Aleksandër Lumezi, ka kërkuar nga kryeprokurori i Prokurorisë Themelore në Pejë, Agim Kurmehaj, si autoritet kompetent, që të rishqyrtojë lëndën penale PP. nr. 68/12 të prokurores Lirije Morina dhe nga të gjeturat të ndërmarrë të gjitha veprimet e nevojshme sipas Ligjit për përgjegjësinë disiplinore të gjyqtarëve dhe prokurorëve”, thuhet në njoftimin nga Zyra e Kryeprokurorit të Shtetit. /Zëri