Lulzim Canaj zyrtarisht nominohet kandidat për kryetar komune në Kamenicë

Gjilan – Lulzim Canaj i cili më herët ishte nominuar nga dega e PDK-së në Dardanë kandidatë për kryetar komune nga radhët e PDK-së, tani edhe zyrtarisht të enjten ka marrë bekimin edhe të Hashim Thaçit dhe të kryesisë qendrore.

Lulzim Canaj tashmë edhe zyrtarisht është kandidatë i nominuar dhe ai së bashku me Shaip Surdullin e LDK-së, Lulzim Lecin e AAK-së e kandidatët tjerë nga kjo komunë do të garojë për zgjedhjet e nëntorit.

Canaj tha për rajonipress se është përgatitur me kohë që të jetë në ballë të këtij projekti të madh që e ka përgatitur për qytetarët e Kamenicës. “Unë besojë që gara kësaj here do të jetë e fuqishme dhe sfiduese. PDK-ja kësaj radhe nuk do të gabojë , por do të jetë e organizuar dhe e koordinuar për t`i fituar zgjedhjet” tha Canaj.

Ndryshe Canaj ka gëzuar një mbështetje të fuqishme nga Emin Krasniqi dhe vet kryesia e Degës së PDK-së në Dardanë .

Lulzim Canaj tah për rajonipress se tashmë ka zgjedhur ekipin i cili do të finalizojë një program-elaborat i cili kryesisht i përkushtohet problemeve dhe ofron zgjidhje për të realizuar kërkesat e qytetarëve të Kamenicës. “Unë kam hartuar një program i cili besoj se është program fitues për zgjedhjet e ardhshme lokale dhe pres mbështetjen e të gjitha strukturave të partisë për kandidaturën time”, tha Canaj.

Canaj tha se në programin e tij prioritet mbi prioritet mbetet përkushtimi për të zgjidhur problemet e qytetarëve, për të investuar në infrastrukturë rrugore e shkollore, investimet në edukim e arsim, investime në fshatrat e brezit kufitarë, lehtësira për bizneset e vogla e të mëdha, shërbime më cilësore për qytetarët, zbatim të rendit e ligjit si dhe ngritja e transparencës brenda institucioneve dhe ngritja e përgjegjësisë nga ana e administratës komunale./rajonipress/