Luksi i politikanëve ta zgjojë Prokurorinë

Organi i akuzës mund t’i nxjerrë para drejtësisë bosët e krimit.

“Te ne prezenca në pushtet ose pozita vendimmarrëse ka qenë garanci që individët e caktuar, e posaçërisht ata të elitës politike, të mos hetohen e as të ndëshkohen”, ka pohuar Ariana Qosja-Mustafa për “Kosova Sot”

Pasurimi i shpejtë nëpërmjet “profesionit në politikë” të shumë njerëzve, të cilët në periudhën e pasluftës janë nisur nga pika zero dhe po bëjnë jetë luksoze, sipas ekspertëve të sundimit të ligjit dhe analistëve politikë, formoi një shtresë, e cila sot e kësaj dite nuk po hetohet nga drejtësia kosovare.

Mafio-politikanët kosovarë, në bashkëpunim e bashkëveprim me mafio-oligarkinë e bizneseve të përbashkëta të kundërligjshme, po bëjnë pasuri marramendëse dhe jashtë çdo kontrolli institucional, duke zhvatur e plaçkitur kundërligjshëm e pandalshëm qytetarin dhe buxhetin e shtetit, përmes bizneseve të tyre monopolisteoligarkike. Pavarësisht se lidhjet e tilla cilësohen edhe konsumim i veprave penale, ndjekja e tyre mbetet temë tabu për drejtësinë kosovare.

Tani ekspertët e fushës dhe analistët shpresën e vetme e kanë varur në ndryshimet e vitit të kaluar në Prokurorinë e Shtetit, që tani kryesohet nga kryeprokurori i ri, Aleksandër Lumezi, që të hapë rastet e dyshimit pa përjashtuar edhe qeveritarët aktualë, sikur edhe mafio-oligarkët e lidhur kundërligjshëm me të fortët e pushtetit./kosova sot/