“Lugu i Verdhë” dhe autostrada fantazmë: Qytetarët “gozhdojnë” Glauk Konjufcën në Kamenicë

Kamenicë – Vizita e zëvendëskryeministrit të parë dhe nënkryetarit të LVV-së, Glauk Konjufca, në Kamenicë, e promovuar me entuziazëm nga kryetari i komunës Kadri Rahimaj, është shndërruar në një valë ironie dhe kritikash të ashpra nga qytetarët në rrjetet sociale, të cilët kanë rikthyer në vëmendje premtimet e pambajtura dhe gjendjen reale të infrastrukturës në këtë komunë.

Rahimaj publikoi fotografi dhe mesazhe optimiste nga takimi “tek Lugu i Verdhë”, ku së bashku me Konjufcën, aktivistë e kandidatë për deputetë të LVV-së, foli për “organizim, angazhim dhe punën që na pret”, duke deklaruar se “Dardana gjithmonë ka qenë e Lëvizjes”.

Por, reagimet e qytetarëve nuk vonuan. Komentet në postimin e kryetarit morën tone ironike dhe revoltuese, duke e kthyer vizitën politike në një debat publik për premtimet e parealizuara të pushtetit.

Qytetari Bardhi Maliqi ironizoi ashpër paraqitjen e delegacionit të LVV-së, duke shkruar se pushtetarëve “nuk ju ka mbetur tjetër veç me luajt pingpong dhe pikado”, ndërsa i akuzoi për propagandë dhe mashtrim politik, duke përdorur një gjuhë të drejtpërdrejtë e të ashpër ndaj figurave të partisë në pushtet.

Edhe më therës ishte komenti i Albert-Shpresa Syla, i cili ngriti çështjen e shumëpërfolur të autostradës së premtuar për Anamoravën.

Ai pyeti me ironi nëse Konjufca kishte ardhur në Kamenicë “kah autostrada e re apo kah rruga e vjetër e rrezikshme”, duke akuzuar drejtuesit lokalë se po buzëqeshin pranë zyrtarëve qendrorë në vend se të kërkojnë llogari për premtimet e pambajtura.

Reagimet pasqyrojnë një zhgënjim në rritje të qytetarëve ndaj diskursit politik të mbushur me fotografi, vizita e slogane, ndërkohë që problemet konkrete infrastrukturore dhe zhvillimore vazhdojnë të mbeten të pazgjidhura në Kamenicë dhe gjithë Anamoravën.

Në vend të entuziazmit elektoral që synonte të prodhonte vizita e Konjufcës, rrjetet sociale u kthyen në një tribunë revolte qytetare, ku ironia dhe kritika duket se po zënë vendin e duartrokitjeve politike./rajonipress/