Lugina në takimin lamtumirës te Presidenti Nishani

Presidenti i Republikës së Shqipërisë, shkëlqesia e tij, z. Bujar Nishani, të shtunën e 20 majit, ka pritur në rezidencën e tij, një delegacion nga Lugina e Preshevës, në përbërje të Shaip Kamberi, kryetar i Komunës së Bujanocit, Fatmir Hasani, deputet popullor, Leme Xhema, Sami Salihu, kryetar i Kuvendit Komunal të Preshevës, Myftiu Nexhmedin ef. Saqipi, zëvendësreis i Rijasetit në Serbi, Naser Aziri nga UDSH, Nagip Aliu, Belgzim Kamberi dhe disa përfaqësues nga diaspora.

Qëllimi i kësaj vizite me karakter lamtumirës, ishte njohja për së afërmi lidhur me gjendjen politike dhe ekonomike të shqiptarëve në rajonin e Luginës së Preshevës.

Fillimisht, presidentin Nishani, e njoftuan për sfidat dhe të arriturat në Luginë të Preshevës, kryetari Shaip Kamberi dhe deputeti popullor në Parlamentin e Serbisë, Fatmir Hasani, duke u fokusuar në shkeljet sistematike të të drejtave të njeriut, shlyerjen e shqiptarëve nga evidenca e gjendjes civile, shpërnguljet në heshtje, mungesën e teksteve, mos njohjen e diplomave e probleme të tjera të natyrës politike dhe ekonomike.

Ata, gjithashtu, falënderuan presidentin Nishani, për kontributin dhe angazhimin e tij, në mandatin pesëvjeçar, sa ishte në krye të shtetit, për përmirësimin e gjendjes së shqiptarëve në Luginë të Preshevës.

Presidenti i Shqipërisë, në largim , z. Bujar Nishani e siguroi delegacionin se angazhimi i tij nuk do të pushoj as në të ardhmen për Luginë, duke rikonfirmuar mbështetjen e Tiranës zyrtare, se “përkrahja e qeverisë, shtetit shqiptar do të vazhdoj të përkujdeset për shqiptaret jashtë kufijve të saj, në këtë rast për shqiptarët etnikë në Preshevë, Bujanoc dhe Medvegjë”, njofton portali i pavarur jetapress.