Lugina braktiset në heshtje

Fenomeni i braktisjes së vendit për shkak të situatës së rëndë ekonomike, edhe pse në heshtje, po vazhdon të zbrazë vendbanimet shqiptare në Luginë të Preshevës.

Pamjet që po shohim çdo mbrëmje të ikjes së shqiptarëve të Kosovës për në vendet e Bashkimit Evropian, tashmë si duket i kanë dhënë një shtytje edhe shqiptarëve të Luginës së Preshevës, të cilët falë liberalizimit të vizave që e gëzojnë, në heshtje po e lëshojnë vendlindjen.

Kjo valë e dytë e ikjes e luginasve, pas asaj në fillim të liberalizimit të vizave në vitin 2009, shihet edhe me lëvizjet autobusëve me qytetarë shqiptarë, që mbajnë lidhjet me vendet e BE-së.

Portali informativ Titulli.com ka arrit të konfirmojë se ikja nga vendlindja për shkak të gjendjes së rëndë ekonomike dhe papunësisë, nga komunat Bujanoc dhe Preshevë, vetëm këtë javë e kanë bërë dhjetëra familje, ndonëse ato pretendojnë se po shkojnë tek të afërmit për vizitë.

“U nisën për në Gjermani me kërku azil. Kushtet e rënda, nuk kanë rrogë, djali me nusen nuk punon, veç një pension që ja ka lënë baba i ndjerë. Djali ka udhëtu me nusen dhe dy fëmijë, nëna nuk ka shku, ka mbet në Bujanoc”, i ka thënë Titullit me anonimitet një anëtare e familjes shqiptare që ka migruar këtë fundjavë.

Kjo dukuri në rritje e lëshimit të vendit, po dëmton me të madhe bërthamën shqiptare në Luginë të Preshevës, sidomos në komunë të Bujanocit ku nuk shihet një perspektiv për jetë më të mirë.

Nëse vazhdohet me këtë fluks të migrimit, shqiptarët e komunës së Bujanocit, në zgjedhjet e ardhshme lokale do ta kenë në pikëpyetje udhëheqjen edhe për një mandat me këtë komunë, ndërsa për disa vite, Bujanoci do të bëhet Medvegja e dytë në Luginë./Titulli.com/