Londër, shtetasi shqiptar kapet me 1 kg heroinë

As policia britanike nuk mundi t’iu besonte syve dhe fatit kur i ra “jack poti” në zbulimin e një sasie droge të gjetur te dy shtetas të Shqipërisë në automjetin e tyre. Në një histori për të qeshur dhe për të qarë, dy shqiptarë, njëri me dokumente të rreme greke dhe tjetri me shtetësi britanike, ishin duke udhëtuar drejt Londrës nëpër autostradën që lidh kryeqytetin me qytetin Birmingham, kur automjetit të tyre iu mbaroi karburanti.

Pasi ndaluan në autostradë, ata kërkuan ndihmë me telefona të posaçëm që gjenden nëpër autostrada për raste emergjencash, të cilët janë të lidhur me qendrat e kontrollit të trafikut të Ministrisë së Brendshme, për të kërkuar ndihmë deri në pikën më të afërt të karburantit, transmeton Top-Channel.

Fillimisht në vendngjarje mbërritën dy policë britanikë të trafikut, të cilët kërkuan në bagazhin e veturës “Audi” të shqiptarëve kavon për t’i tërhequr, kur papritur gjetën në të disa kuti me pesticide në sasi të pazakonshme, të cilat ngritën dyshime.

Pas një kontrolli më të imëtë ata gjetën në automjet rreth 1 kilogram heroinë, me vlerë rreth çerek milioni funte.

Shqiptari që kishte dokumente të rreme greke e pranoi fajësinë në gjykatën, ndërsa shqiptari tjetër, me shtetësi britanike, i cili ishte udhëtar, u shpall i pafajshëm nga gjykata, pasi nuk kishte asnjë provë që e lidhte atë me këtë vepër penale. /Telegrafi/