“Loja” me pagat e administratës së UP-së

Ministria e Administratës Publike ( MAP) është e pajtimit që të bëhet nivelizimi dhe harmonizimi i pagave për të gjithë punonjësit e administratës në Universitetin e Prishtinës (UP). Por, kjo do të ndodhë pasi UP-ja të bëjë një përshkrim të detajuar të vendeve të punës në administratës në UP, gjë që nuk është bërë deri më tani.

Vetëm atëherë MAP-i do të mund të bëjë caktimin e koeficienteve për të gjitha kategoritë e nëpunësve civilë.

Ministri Mahir Yagcilar ka thënë për Tribunën se në takimin që e kanë zhvilluar ditë më parë me rektorin Ibrahim Gashi dhe ministrin e Financave, Besim Beqaj, janë pajtuar që Universiteti i Prishtinës të hartoj organogramin dhe të bëjë klasifikimin e punëtorëve administrativë.

“Edhe sipas klasifikimeve të shërbyesve civilë, do të bëjmë një riorganizim dhe në këtë aspekt automatikisht do të arsyetohet përqindja e rritjes që pagave për administratën”, ka thënë ministri Yagcilar.

Por kjo, sipas tij, varet tani nga angazhimi i UP-së. Për t’u realizuar një rritje e tillë e pagave, sipas ministrit Yagcilar, nuk ka asnjë problem buxhetor.(Tribuna).