Loja me heronjtë

Midis zhurmës së fushatës parazgjedhore, kryeministri i Shqipërisë, Edi Rama, lansoi në fund të javës së shkuar iniciativën për t’i varrosur në Vlorë eshtrat e Isa Boletinit, duke stopuar kështu përgatitjet që prej vitesh bëhen në Kosovë për t’i varrosur në vendlindjen e këtij Heroi, në Boletin të Mitrovicës. Rama siguroi mbështetjen e Hashim Thaçit, zëvendëskryeministër i Kosovës, shkruan sot Koha Ditore.

Javën e shkuar, të dy dolën para medieve, bashkë me disa anëtarë të familjes Boletini, për të kumtuar lajmin se më 10 qershor, kur është edhe përvjetori i Lidhjes Shqiptare të Prizrenit, do të organizohet ceremonia e rivarrimit në Qytetin e Pavarësisë.

Rama foli për një ceremoni mbarëkombëtare, për rrugëtimin e arkëmortit të Heroit të Kombit përmes Kosovës e Shqipërisë, dhe për varrimin në Sheshin e Flamurit Kombëtar në Vlorë, pranë Ismail Qemalit. U shprehu mirënjohjen familjarëve të Isës e të dëshmorëve të flijuar së bashku me të për interesin e lartë të kombit, për pranimin e idesë së vendosjes së eshtrave të Heroit në Vlorë.

Më shumë se Rama, Thaçi e pështolli këtë iniciativë me diskurs nacionalist. Tha se, me mesazhin e tyre, Ismail Qemali e Isa Boletini e kanë bashkuar një herë e përgjithmonë kombin shqiptar. Prandaj, tha që edhe 10 qershori do të dërgojë mesazhin e një perspektive më të sigurt integruese dhe bashkuese për kombin shqiptar.

Dhe kjo situatë prodhoi debat të madh, të fokusuar jo vetëm në vendvarrimin, por edhe në politikanët që nuk kursejnë as heronjtë për qëllime të tyre puro politike.

http://koha.net/?id=27&l=58797