Logos i pranishëm në Artanë edhe në vitin 2013

Gjilan – Norbert Pijls në takim me Bajrush Ymerin ka premtuar se projekti Logos do të vazhdojë ta përkrah edhe në vitin 2013 komunën e Artanës. Ai tashmë ka premtuar një donacion prej 30 mijë eurove për të rinovuar disa shkolla në këtë komunë.

Kryetari i Komunës së Novobërdës Bajrush Ymeri është takuar të premten me zotin Norbert Pijls, koordinator i projektit Logos.

Gjatë këtij takimi Ymeri e ka falënderuar zotin Pijls për përkrahjen dhe mbështetjen e vazhdueshme që po jep qeveria Zvicerane përmes projektit LOGOS. ,,Falë punës së përbashkët që kemi bërë së bashku në mbledhjen e datës 28 dhjetor 2012 ne aprovuam Planet Zhvillimore Komunale, Planin urban për zonën kadastrale të fshatit Bostan dhe vlerësimin strategjik mjedisor për Komunën e Novobërdës. Po ashtu falë përkrahjes dhe mbështetjes së juaj ne sot kemi të ndërtuar trotuarin për rreth rrugës kryesore Llabjan-Koznicë dhe po ashtu në të gjitha vend pritjet për autobus ndërtuam kabina për pritje e autobusëve për qytetarët tanë. Këto janë disa projekte kapitale që ne i realizuam së bashku gjatë vitit 2012 me bashkëfinancim dhe me këtë rast dëshirojë të falënderojë juve personalisht, stafin e juaj dhe tërë Qeverinë Zvicerane” është shprehur Ymeri.

Kurse Norbert Pijls, koordinator i projektit ka falënderuar Ymerin për bashkëpunimin e mirë dhe e ka njoftuarat atë se projekti LOGOS ka paraparë që edhe këtë vit të vazhdojë bashkëpunimin me komunën e Novobërdës dhe atë do të mbështetet në disa fusha. ,,Do të punojmë edhe këtë vit për vazhdimin e punës rreth planeve zhvillimore rreth implementimit të disa projekteve që burojnë nga këto plane. Po ashtu do të vazhdojmë të mbështesim komunën në organizimin e debateve rreth buxhetit komunal, do të ndihmojmë komunën në organizimin e zgjedhjeve nëpër fshatra për zgjedhjen e këshillave lokale. Pastaj do të implementojmë një projekt deri në vlerën prej 30.000 euro me kusht që komuna të participojë këtë vit me 30 % dhe pas konsultimeve me ju ky projekt ka të bëjë me renovimin e disa shkollave. Po ashtu do të vazhdojmë të mbështesim zyrën për barazi gjinore” u shpreh zoti Pijls./rajonipress/