Llashtica e Bresalci bëhen me Sheshin e Lirisë dhe Memorialin e Dëshmorëve

Gjilan – Dy projekte të rëndësishme janë duke u punuar në emër të 100 vjetorit të Pavarësisë së Shqipërisë. Në Bresalc po ndërtohet Sheshi i Lirisë kurse në Llashticë Memoriali i Dëshmorëve po rinovohet tha Qemajl Mustafa.

Komuna Gjilanit ka përzgjedhur dy projekte të rëndësishme që do të jenë gati me rastin e 100 vjetorit të Pavarësisë së Shqipërisë. Rreth 70 mijë euro janë paraparë për ndërtimin e Sheshit të Lirisë në Bresalc dhe meremetimin-renovimin e Lapidarëve të dëshmorëve në Llashticë.

Qemajl Mustafa tha për rajonipress se memorialët në Llashticë e Bresalc janë edhe një përkushtim i përhershëm dhe i sinqertë i komunës për investimin e madh që kanë bërë heronjtë dhe dëshmorët tanë për liri e dinjitet tonin gjatë gjithë historisë.”Këto dy memoriale e kanë edhe rëndësisë e vet simbolike e ajo është lufta e brezave të hershëm për pavarësinë e Shqipërisë që nisë me Idriz Seferin e deri tashti në ditët tona qw kulmoi me luftën e UÇK-së dhe me rënien heroike të Agim Ramadanit e Abdullah Tahirit, Hanumshahe Abdullahut e shumë të tjerëve nga kjo anë “.

Mustafa tha se këto investime do të vazhdojnë secilin vit dhe kështu do ta pasurojmë komunën me refleksionin e asaj që është mbjellë në tokën e komunës e të Kosovës për ta lindur pavarësinë e saj e që është gjaku dhe eshtrat, pra jeta e njeriut tonë dëshmorë

Edhe, Fadil Osmani menaxher në zyrën e projekteve tha se me 20 mijë euro në këto dy projekte ka participuar Ministria e Planifikimit Hapësinor kurse pjesën tjetër komuna. Osmani tha se ka qenë prioritet i kryetarit Qemajl Mustafa që në këto dy fshatra të rregullohen ashtu siç duhet memorialët.

Në fshatin Bresalc pos Sheshit të lirisë është duke u punuar edhe rregullimi i shtratit të lumit në lagjen e xhamisë. Osmani është i bindur se këto dy projekte do të përfundojnë përpara datës 28 nëntor./rajonipress/