Listën serbe s’e shohin pengesë!

Lista Serbe ndonëse e krijuar me direktivat e Beogradit zyrtar, nuk mund të ketë rol vendimmarrës në krijimin e institucioneve shtetërore para fillimit të vitit 2015. Kjo Listë që pritet të jetë pjesë e qeverisjes PDK-LDK në katër vitet e ardhshme, nuk mund të shndërrohet as në pengues të rëndësishëm në këtë proces. Të paktën, këto janë vlerësimet e analistëve politikë në vend, ndonëse ata e pranojnë se Lista Serbe do të provojë të përfitojë sa më shumë nga situata dhe rrethanat e krijuara.

Analisti Imer Mushkolaj, për Tribunën ka thënë se kjo listë do të provojë t’i pengojë proceset që nuk janë në favor të politikës serbe. “Pavarësisht që nuk kanë qenë pjesë e grupeve punuese, besoj që Lista Serbe do të marrë poste me automatizëm. Lista do të sillet në institucione sipas disponimit që autoritetet e Serbisë do të tregojnë karshi Kosovës”, ka thënë Mushkolaj.

Më tej ai ka porositur shumicën shqiptare që të ketë kujdes që të mos arrijë në situatë që të mbetet peng i votave të kësaj liste. Në anën tjetër Artan Muhaxhiri në një prononcim dhënë gazetës, ka thënë se kërkesat e Listës Serbe dhe mundësia që kjo e fundit të paraqesë problem në realizimin e marrëveshjes mes PDK-së dhe LDK-së janë vetëm një blof politik…(Tribuna).