Lista Serbe kundër votimit të 21 prillit, Knaus: Strategjia ndërkombëtare dështoi, nëse BE s’zgjohet, do të ketë luftë
RajoniPress
11:50, 8 Prill, 2024
Gerald Knaus nga Iniciativa Europiane për Stabilitet thotë se kriza në Kosovë që e nxiti dhunën në veri “do të vazhdojë”, se kjo “nuk mund ta befasojë askënd” dhe se nëse Gjermania, Franca, BE-ja nuk zgjohen, do të ketë luftëra të reja, raporton Gazeta Express.
Knaus shkroi kështu në “X” duke marrë shkas nga deklarimi i djeshëm i Listës Serbe, e cila doli kundër votimit të 21 prillit për largimin e mundshëm të kryetarëve shqiptarë nga udhëheqja e katër komunave veriore.
“Duket si një krizë e cila filloi kur kryetarët e komunave nga lista serbe në veri të Kosovës dhanë dorëheqje në fund të vitit 2022, pikërisht në momentin kur Gjermania dhe Franca shtynë për pranimin e propozimit të tyre të normalizimit në Beograd për ‘njohjen de facto’, e cila u thellua kur lista serbe bojkotoi zgjedhjet e reja në vitin 2023, duke synuar krijimin e një vakumi ligjor në veri të Kosovës pa autoritete lokale ligjore fare, që nxiti dhunën më të keqe në një kohë të gjatë… do të vazhdojë. E cila nuk mund ta befasojë askënd”, shkroi Knaus.
Ai shkroi se strategjia aktuale e BE-së dhe SHBA-së për dialogun Kosovë-Serbi, ka dështuar.
“Strategjia aktuale e dialogut të BE-së për Serbinë-Kosovën ka dështuar. Beogradi që në fillim ka hedhur poshtë hapur çdo strategji njohjeje ‘de facto’. Beogradi e përsëriti këtë, përsëri dhe përsëri: nuk ka marrëveshje. Nuk ka pasur kurrë. Strategjia e BE-së (dhe e SHBA-së) bazohet në analizën e gabuar: që procesi aktual i anëtarësimit në BE i jep BE-së ndikim në Serbi”, shkroi Knaus.
“Nuk e bën më. Një arsye e dukshme për kolapsin e levave të BE-së është rënia e çdo politike të besueshme të pranimit në BE për këdo në rajon”, shtoi ai.
“E gjithë kjo bën që ky të jetë momenti më i rrezikshëm në Ballkan që nga viti 2001”, shkruan Knaus.
Ai thotë se “shumë në të gjithë BE-në ende nuk e shohin ose pretendojnë se nuk e shohin këtë”, duke shtuar se kjo nuk zgjidhet me “Planin e rritjes”.
“Në vend të kësaj, lojtarët kryesorë në rajon presin dhunë të re dhe përgatiten për të. Nëse Gjermania, Franca, BE-ja nuk zgjohen, do të ketë luftëra të reja. Dhe një dështim vërtet katastrofik të BE-së”, shkroi Knaus.
