Lirohet nga aktakuza dhe shpallet i pafajshëm Afrim Matoshi, procesi ndaj tij zgjati katër vite

Gjilan – Gjykata Themelore në Ferizaj, departamenti për krime të rënda të kryesuar nga Mustafë Tahiri ka liruar nga aktakuza dhe ka shpallur të pafajshëm zyrtarin doganor, Afrim Matoshi i cili dyshohej se ka kryer veprën penale “Keqpërdorimi i pozitës apo autoritetit zyrtar”. Avokati mbrojtës Shemsedin Piraj thotë se aktakuza është hedhur poshtë sepse askund nuk është vërtetuar se i njëjti ka qenë i përfshirë në veprën me të cilën ngarkohej.

Zyrtarit doganor Afrim Matoshit i është dashur të përballet katër vite të plota për të ardhur deri tek verdikti final i cili e liron nga aktakuza dhe shpallet i pafajshëm më 12 gusht 2021 nga paneli i Gjykatës Themelore në Ferizaj, që kryesohej nga Mustafë Tahiri.

Afrim Matoshi akuzohej se ka keqpërdorur pozitën zyrtare me qëllim të përfitimit të kundërligjshëm duke lëshuar një maunë, duke mos u përputhur faturat me vlerën e mallit, derisa dyshohej për një vlerë prej 240 mijë eurove.

Avokati mbrojtës Shemsedin Piraj tha për rajonipress se Afrim Matoshit i është ngritur aktakuza në vitin 2017 që do të thotë i është dashur katër vite të bredhë poshtë e lartë për të ardhur deri tek akti final. “Aktakuza ka ra poshtë sepse janë kryer dy ekspertiza financiare të cilat kanë konstatuar se doganieri nuk e ka keqpërdorur detyrën dhe se i njëjti nuk e ka kryer veprën penale me të cilën edhe ngarkohej. Është dashur të ndërrohen tri panele gjyqësore dhe ky rast tregon se pa sigurimin e provave nuk është mirë të ngritën aktakuza dhe të merren në qafë njerëzit ose tu dëmtohet autoriteti dhe integriteti duke e degraduar personin e pafajshëm” tha Piraj./rajonipress/