Liridon Fetahaj siguron fitoren e Prishtinës

Gjilan – Futbollistët e Vllaznisë së Pozheranit, të cilët ndeshjet e tyre i zhvillojnë në Gjilan, në javën e 16-të, të Superligës së Kosovës në futboll, janë mposhtur nga Prishtina me rezultat 0-2.

Për trajnerin e Vllaznisë së Pozheranit, Bylbyl Sokolin, kjo ishte ndeshja e 6-të, të cilën e udhëheqë tek të Gjelbërit e Vllaznisë dhe ka arkëtuar vetëm një pikë.

Sokli pas ndeshjes ka deklaruar se nuk mundet kështu më dhe pritet të jep dorëheqje nga Vllaznia.

Futbollisti më i mirë i ndeshjes së sotme ishte sulmuesi Liridon Fetahaj, i cili shkëlqeu duke shënuar dy gola duke i dhuruar skuadrës së tij tri pikë të vlefshme drejt kreut të tabelës së klasifikimit.

Futbollistët e Prishtinës ishin ata që gjatë 90 minutave dominuan në fushë, ndërsa futbollistët e Vllaznisë asnjëherë nuk arritën të rrezikojnë portën e portierit Bekaj të Prishtinës.

Debatik Curri në minutën e 5-të, ka goditur pingulën e portierit të Vllaznisë, Bajrami.

Në minutën e 20-të, arbitri nga Mitrovica, Fatmir Thaçi, akordon penalti për Prishtinën por arbitri anësor Fatlum Berisha, sinjalizon se nuk ishte penalti dhe Thaçi e anulon një vendim të tillë.

Shtatë minuta më vonë, Fetahaj mjeshtërisht depërton duke e lënë të shtangur portierin Bajrami duke shënuar 0-1.

Në fund të pjesës së parë mesfushori Bozhoviq nga 30 metra godet horizontalen e Bajramit.

Golin e nokautit futbollistët e Prishtinës e shënojnë në minutën e 90-të, së pari Bozhoviq gjen futbollistin këmbë shpejt, Liridon Fetahaj, i cili nuk e pati vështirë me kokë nga 8 metra ta vulos fatin e këtij takimi.

Sulmuesi i Prishtinës dhe gola shënuesi i dyfishtë i kësaj përballje Liridon Fetahaj pas ndeshjes deklaroi.
“Ishte një ndeshje e vështirë, e patëm të vështir pasi Vllaznia nuk kishte çka të humbte, këta dy gola ia dedikoj klubit dhe është një fitore e merituar shpresoj se edhe në ndeshjet tjera do të shënoj”.

Në javën e 17-të, Vllaznia ballafaqohet me Dritën./rajonipress/