Liria nuk kishte kampione më të madhe se Madeleine Albright

Presidentja e vendit, Vjosa Osmani dhe ambasadori amerikan në Kosovë, Jeffrey Hovenier kanë përkujtuar ish-sekretaren amerikane, miken e Kosovës, Madeleine Albright në dyvjetorin e ndarjes nga jeta.

Presidentja e vendit, Vjosa Osmani në një postim në X shkruan se trashëgimia e saj është skalitur jo vetëm në faqet e historisë sonë, por edhe në strukturën e vendit tonë.

“Ne do ta kujtojmë përgjithmonë kontributin e saj të jashtëzakonshëm për lirinë dhe demokracinë tonë”, shkruan Osmani.

Në dyvjetorin e ndarjes nga jeta, Albright është përkujtuar edhe nga ambasadori amerikan, Jeffrey Hovenier, i cili e quan mikeshë të vërtetë të Kosovës.

“Sot ne nderojmë një mikeshë të vërtetë të Kosovës, Sekretaren Albright, në përvjetorin e vdekjes së saj. Siç tha Presidenti Biden, ‘Liria qëndron përballë çdo agresori, sepse ka gjithmonë nga ata që do të luftojnë për atë liri. Dhe në shekullin XX dhe XXI liria nuk kishte kampione më të madhe se Madeleine Korbel Albright’”, shkruan ambasadori. /Telegrafi/