Linçimi i pandershëm i Isa Mustafës

Nga Shefik Sadiku – Edhe pak më herët, por,sidomos, gjatë kohës së bisedimeve për lidhjen e koalicionit me VV-në dhe sidomos pas mocionit ndaj Qeverisë Kurti më 25.3.2020 e këndej, nuk kanë së rreshturi fyerjet e sharjet ndaj Isa Mustafës, si lider i LDK-së.

Të sqarohemi drejt: Isa Mustafën as nuk e kam takuar kurrë në jetë,as nuk e kam votuar kurrë në jetë, prandaj kërkoj nga lexuesit mos të më keqinterpretojnë. Isa Mustafa nuk erdhi dje në krye të LDK-së, as pardje e as para një viti; Isa Mustafa nuk erdhi dhunshëm në krye të LDK-së, as krye më vehte; Isa Mustafën nuk e zgjodhën në krye të partisë pesë vetë, as dhjetë, por një strukturë e gjërë partiake; Isa Mustafa nuk është djelē pesë vjeçar e as dhjet vjeçar, por është burrë më shumë se 65 vjeçar; Isa Mustafa nuk erdhi nga Serbia e as nga Rusia, ai lindi e është rritur këtu. Prandaj marrë parasysh të gjitha këto dhe shumë të tjera është krejt e pandershme, fyese, jo humane, e pamoralshme, jo njerëzore krejt ajo çka po flitet dhe çka po shkruhet kundër tij.

E kaluara politike e shoqërore e Isa Mustafës në ish sistemin e kaluar nuk është se ka qenë e panjohur për qytetarët e Kosovës,aq më pak për votuesit e LDK-së. E dhëna se ka qenë anëtar i LKJ(Lidhjes komuniste) nuk është se ka qenë e pa ditur nga qytetarët e aq më pak nga ata pak më të moshuar. Nisur nga ky fakt, sa jemi të sigurtë se edhe Fatmir Sejdiu e Ibrahim Rugova nuk kanë qenë anëtarë të LKJ-ë ?

Po Nexhat Dac ? Nëse këto dikush i ka ditur shtrohet pyetja kush dhe si e zgjodhi ministër te financave në Qeverinë Bukoshi në ekzil ? Kush e kandidoi dhe e votoi dhe nga ato vota u zgjodh Kryetar i Prishtinës ? Nëse paska qenë ,siç po shkruajnë portalet,disa media, rrjetet sociale, disa figura publike e mediale atëherë shtrohet pyetja a jemi ne në rregull, apo Isa Mustafa paska pasur gjithë këtë fuqi ? A thua asgjë të mirë dhe asnjë meritë nuk e paska Isa Mustafa për LDK-në ?

Sipas atyreve që pakursyeshëm po e shajnë dhe po e linçojnë çfarë qenka dashur të bëjë Isa Mustafa për partinë ? Ai ( ndoshta jo vetëm ai) vunë vija të kuqe për PDK-në dhe sigurisht ato vija të kuqe, për ata që po e shajnë Isa Mustafën, do të ishin të preferuara edhe për AAK-në, NISMË-n dhe AKR-në,atëherë kush po mbetet partner i mundshëm për të qeverisur me LDK-në ?

Nga zgjedhjet e 6 tetorit,LDK-ja lindi koalicionin me VV-në, por ky koalicion nuk pati jetëgjatësi a thua krejt me fajin e Isa Mustafës ? Kam përshtypjen se ata që po e shajnë dhe linçojnë Isa Mustafën, pa vetëdijshëm dhe pa e menduar shtruar, po kërkojnë nga lideri shndrrimin e partisë në gjithçka vetëm jo LDK, sadoqë ata po thirren në filozofinë rugoviane, por as filozofia rugoviane nuk ka qenë përjashtuese siç po kërkojnë militantët e zjarrtë të LDK-së t’i përjashtojnë nga bashkëpunimi të gjitha partitë ! Ta shashë ditë e natë me sharjet më banale liderin e partisë pse bashkëpunon me partitë tjera dhe të kërkosh nga ai të pamundshmen, kjo është më tepër hipokrizi dhe aspak e ndershme.

Në fund, gjithë këto sharje e fyerje që i adresohen liderit të partisë nga gjoja dashamirês të partisë, a nuk e përmbajnë në vetvete ,indirekt, këtë adresim fyes për masën e votuesve të LDK-së, që nuk është masë e papërfillshme ?