Limaj: Seanca e fundit e Kuvendit të Kosovës, një rast i humbur

Zëvendëskryeministri i Kosovës, njëherit kryetar i Nismës Socialdemokrate, Fatmir Limaj ka thënë se fillimi i seancës së djeshme të Kuvendit të Kosovës ishte shpresëdhënës për zgjidhjen e ngërçit në Kuvend, por ishte një rast i humbur.

“Është një rast i humbur dhe Kuvendi i Kosovës nuk është treguar në lartësinë e duhur në përgjegjësinë që ka. Ky është një lajm i keq për Kosovën, për atë që ndodhi dje dhe sot.

Limaj në “Debat Plus” me Ermal Pandurin në RTV Dukagjini tha se ka munguar vullneti i duhur i një pjese të partive politike.

“Përfaqësuesit e rezolutës (LDK dhe Vetëvendosje) nuk ishin të gatshëm të ulen dhe të fusin edhe pikat e tjera të propozuara nga subjektet tona politike dhe kjo e ka sjellë atë që u pa sonte (dështimi i votimit të rezolutës).

Kryetari i Nismës Socialdemokrate ka thënë se nëse opozita do të votonte delegacionin shtetëror për bisedime do t’i merrte të drejtën Presidentit për të udhëhequr me bisedime.

“Kjo mazhorancë i ka dhënë hapësirën opozitës që të bëjmë një delegacion shtetëror ku do të udhëhiqej dhe mbikëqyrej nga këta të fundit. Kjo ofertë asnjëherë nuk i është dhënë ndonjë herë opozitës në Kosovë”.

Limaj thotë se është e arritur politike që një pjesë e opozitës ka filluar të reflektojë për procesin e dialogut me Serbinë.

“Kemi tre muaj që e presim opozitën të jetë pjesë e delegacionit shtetëror për bisedime. Por është e arritur politike që një pjesë e opozitës ka filluar të reflektojë”, deklaroi Limaj./Telegrafi/