Limaj: Presidenti të zgjidhet nga vota e popullit

Kryetari i Nismës për Kosovën Fatmir Limaj ka thënë se Presidenti I Kosovës duhet të zgjidhet përmes votës së popullit. Kjo sipas Limajt duhet të bëhet përmes ndryshimeve ligjore.

Limaj ka thënë se eksperiencat e deritanishme kanë treguakr se zgjedhja e presidentit përmes Kuvendit, ka treguar në shumë raste që presidenti i vendit nuk e ka luajtur rolin unifikues, duke u bërë siç ka thënë ai, është bërë pjesë e pazareve politike.

Ky është postimi i Limajt në Facebook
Mënyra e zgjedhjes dhe funksionimi i institucionit të presidentit të republikës, sidomos viteve të fundit na jep argumente të mjaftueshme për të ndryshuar mënyrën dhe rregullat e zgjedhjes se presidentit.

Rregulla e deritanishme e zgjedhjes së presidentit nga parlamenti, mjaftueshëm na ka treguar që presidenti jo vetëm që nuk ka mundur të ushtroj rolin e tij unifikues, por fatkeqësisht shpeshherë institucioni i presidentit është bërë pjesë e kombinimeve dhe e pazareve politike.

Prandaj, duke marr parasysh edhe klimën aktuale politike në të cilën është vendi ynë sot, poashtu edhe duke e ditur se ky parlament e ka vënë në pikëpyetje legjitimitetin e vet, është më se e sigurt që zgjedhja e presidentit nga ky parlament nuk do të përmbushte kërkesën kushtetuese që presidenti të përfaqësoj unitetin e popullit.

Është momenti ideal që me vullnetin politik të të gjitha forcave politike dhe në emër të fuqizimit të këtij institucioni të përfundojnë sa më shpejtë reformat e nisura ligjore, në mënyrë që njëkohësisht dhe sa më shpejt të shkojmë në zgjedhje edhe parlamentare dhe poashtu në të njëjtën kohë edhe presidenti të zgjidhet drejtpërdrejt me votë të qytetarit.
F.L