Limaj për ftesat nga Gjykata Speciale: Asgjë s’keni parë, çka keni për të parë

Kreu i Nismas Socialdemokrate, dikur komandant i Ushtrisë Çlirimtare të Kosovës, Fatmir Limaj, i njohur me nofkën “Çeliku”, ka folur rreth ftesave të Gjykatës Speciale.

Limaj tha se Kosova është tronditur atë ditë kur u votua Gjykata dhe tani të gjithë do i shohin pasojat.

”Kosova është tronditur atë ditë kur është votuar Gjykata Speciale. Ata që se kanë ditë e kanë kuptuar sot”.

”Nuk ka vend në botë, çka është duke ndodhur me ne”.

”Me u djeg krimi mbi baza etnike! – krimi është krim nuk njeh bazë etnike dhe me shku me ndjek një grupacion veç një etnitet e jo tjetrin, ky është racizëm – është e padrejtë”, ka thënë ai në Klan Kosova.

”Ne e kemi kundërshtuar por fatkeqësisht deputetët e këtij Parlamenti e kanë votuar. Mirë është me i pyet ata që e kanë votuar Gjykatën Speciale – Si po ndihen?”.

Limaj paralajmëroi se nuk do të jenë vetëm këto ftesa ndaj liderëve për intervistim, pasi shtoi se para Speciales do të jetë secili pjesëtar i UÇK-së.

”Kjo asgjë s’është. Kurrgjë s’keni parë – çka keni për të parë. Akuzat, gjykimet, dënimet e mundshme – për çka është krijuar Gjykata? -kush ka qenë pjesëtar i UÇK-së, krejt kanë me i thirrë”.

”Çdo pjesëtar i UÇK-së ka mundësi me u thirrë, kur t’do Gjykata Speciale”.

”Kjo nuk është spektakël, është mjerim, pasojat i shohim më vonë”.