Limaj: Nuk bëmë autogol

Kryetari i Nismës për Kosovën, Fatmir Limaj, ka thënë se nuk ishte autogol dërgimi i komenteve të deputetëve të koalicionit LDK-AAK-Nisma në Gjykatën Kushtetuese për seancën konstituive të 17 korrikut.

Pas takimit me liderin e LDK-së, Isa Mustafa dhe atë të AAK-së, Ramush Haradinaj, lideri i Nismës ka thënë se dërgimi i komenteve është bërë me kërkesë të Gjykatës Kushtetuese.

“Ne kemi pasur obligim t’i përgjigjemi Gjykatës Kushtetuese, sepse Gjykata ka kërkuar nga ne nga një sqarim. Besoj se ata që kanë thënë një gjë të tillë ka qenë dashur të shohin kërkesën e Gjykatës. Gjykata ka kërkuar nga secili deputet që të japë përgjigje dhe ne kemi pasur obligim të përgjigjemi”, ka thënë Limaj.

Ndërkaq, ish-gjyqtarja e Gjykatës Kushtetuese, Gjyljeta Mushkolaj, dërgimin e komenteve në Kushtetuese nga ana e koalicionit LDK-AAK-Nisma e pati konsideruar si gabim taktik. Ajo ka thënë se koalicioni LDK-AAK-Nisma bëri autogol kur i dërgoi komentet. Sipas saj, deputetët janë ata që vendosin për Grupin më të madh Parlamentar e jo Kushtetuesja. /RTK/