Ligji i ri “betonon” militantët partiakë në shërbimin diplomatik

Ministria e Jashtme forcon pozitat politike në diplomaci. Maloku: Kjo qasje e re e ministrit të Jashtëm përbën një storie të re dështimi.

“Aktualisht për këtë mandat, nga 6 kandidatë sa kanë qenë të propozuar për misionet diplomatike për ambasadorë dhe konsuj, vetëm Leon Malazogu dihet që nuk vjen nga ndonjë zyrë partiake, derisa të gjithë të tjerët janë anëtarë me lera të partive politike nga PDK-ja dhe LDK-ja, të gjithë të tjerët kanë ardhur me preferenca partiake dhe është shumë interesat, që ndarjen po e bëjnë të barabartë 50% me 50% për ato pozita”, thotë deputeti Zafir Berisha për “Kosova Sot”

Përfaqësues të subjekteve politike opozitare në Komisionin për politikë të jashtme në Kuvendin e Kosovës dhe analistë politikë, nuk presin ndryshime pozitive në politikën e jashtme të vendit, edhe pas procedimit dhe pritjes për miratim nga deputetët të Projektligjit për shërbimin e jashtëm. Edhe ky dokument i ri, që për opinionin është lansuar si qasje e re e strukturimit profesional të politikës së jashtme, sipas opozitës dhe analistëve politikë, nuk shkon fare përtej një dështimi të radhës nga Ministria Jashtme, pasi që përmes këtij projektligji vetëm rehatohen dhe forcohen pozitat e militantëve partiakë në shërbimin e jashtëm dhe nuk favorizohen profesionistët dhe ekspertët e kësaj fushe./kosova sot/