Lidhur me zgjedhjet parlamentare…!

Nga Bilall Maliqi – Partitë politike në Luginë të Preshevës duhet t’i bojkotojnë zgjedhjet parlamentare që do të mbahen vitin e ardhshëm në Serbi. Ka shumë arsye për bojkot, duke u nisur nga padrejtësitë e panumërta që po iu bëhen popullatës shqiptare në Luginë të Preshevës, nga moslejimi i përdorimit të flamurit kombëtar, moslejimit të teksteve nga Republika e Shqipërisë dhe nga Kosova, shkyerja nga regjistrat civilë të shqiptarëve në Medvegjë, por edhe në Bujanoc, mos nostrifikimi i diplomave të arritura në fakultetet e Republikës së Kosovës, largimin e gjyqit nga Presheva, terminalit, bankave, shërbimin kadastral, mospunësimi i të rinjve shqiptar në bazë të strukturës së popullatës, investimet 0% etj.

Nisur nga ky pikëvështrim partitë tona politike duhet të unifikohen, për t’i bojkotuar zgjedhjet dhe për t’ia bërë me dije shtetit se nuk ka klimë të mirë për pjesëmarrje në këto zgjedhje. Shtrohet pyetja: Çfarë bëri deputeti popullor për këtë mandat dhe çfarë bënë edhe dy deputetët paraprakë?! Nuk është me rëndësi për popullatën tonë vetëm pjesëmarrja në zgjedhje dhe të sigurohen një apo dy rroga deputetësh, por çfarë në të vërtetë mund të bëjnë ata, dhe përgjigjja është e qartë ASGJË.

Prandaj kur jemi në prag të vazhdimit të dialogut Prishtinë -Beograd, duhet shtruar kjo çështje e pjesëmarrjes në zgjedhjet parlamentare. Të kërkohet reciprocitet me deputetët serbë në Kosovë, të cilët i kanë të rezervuar 10 mandate dhe po luajnë rol kyç në parlament, pra edhe ne duhet t’i kërkojmë bile 5 vende të rezervuara. Për t’i paraqitur problemet e shqiptarëve të Luginës nuk është i vetmi vend ku duhet të shtrohen, (sepse) po këta që me ligje na kanë diskriminuar nuk i marrin parasysh këto probleme.

Bujanoci është bërë qendër e misioneve të huaja, aty mund të adresohen problemet tona. Prandaj duke u nisur nga ky pikëvështrim, them se duhet bojkotuar këto zgjedhje, për t’i hapur rrugë bisedimeve të liderëve të politikës së Luginës me palën serbe, për ta gjetur një shteg për dalje nga kjo katrahurë katastrofale politike…!

Bilall Maliqi