Liderët politik po e stopojnë reformën zgjedhore

Përderisa Kosova është në periudhën e zgjedhjeve lokale, reforma zgjedhore është harruar nga subjektet politike. Një ndër shkaktarët se pse kjo ka mbetur nën hije, sipas ish kryetarit të Komisionit për Reformë Zgjedhore, Haki Demolli është edhe marrëveshja për normalizimin e marrëdhënieve mes Kosovës dhe Serbisë.

“Spektri politik më shumë ka qenë i fokusuar në bisedat që janë zhvilluar me Serbinë dhe në proceset e ndërsjella me të. Për mendimin tim ajo ka qenë më ndikuesja që në njëfarë forme, të lihet nën hije reforma zgjedhore”, tha Demolli.

Në anën tjetër, Shqipe Pantina, anëtare e Bordit Ekzekutiv të KDI-së, thotë për Radio Kosovën se reforma zgjedhore është tërësisht në dorë të shefave të partive politike.

“Janë liderët politik ata që po e stopojnë reformën zgjedhore, duke i bërë llogaritjet për hesapet e tyre. Mendoj se reforma është më shumë peng i interesave të ngushta të disa liderëve politik”, tha Pantina.

Sipas Pantines, zgjidhja e vetme e nyjës që e ka lidhur reformën zgjedhor është kthimi i saj në Kuvend.

“Reforma Zgjedhore patjetër se duhet të kthehet në Kuvend sepse aty e ka vendin, është bërë shumë punë e sidomos e komisioneve parlamentare për të arritur deri te reformimi”, tha Pantina.

Pantina, po ashtu thekson se liderët politikë po presin edhe rezultatet e zgjedhjeve lokale në mënyrë që të dinë se çfarë lloj të sistemit zgjedhor të aplikojnë më pas në Kosovë. /Telegrafi/