Liberalizimi i vizave, eurodeputeti: Kosovë ju jeni pjesë e Evropës

Eurodeputeti holandez, Thijs Reuten, ka përgëzuar qytetarët e Kosovës pasi Parlamenti Evropian ka dhënë dritën jeshile përfundimtare për udhëtimin pa viza në BE për Kosovën.

Reuten ka thënë se shtetasit e Kosovës tashmë janë pjesë e Evropës, transmeton Telegrafi.

“Krenar që më në fund e realizuam këtë premtim të vonuar të BE-së për qytetarët e Kosovës. Ju jeni pjesë e Evropës! Tani mund të hapim kapitullin tjetër duke ndërtuar më tej të ardhmen tonë të përbashkët”, ka thënë ai në shkrimin e bërë në Twitter.

Ndryshe, sot Parlamenti Evropian i tha sot po liberalizimit të vizave të Kosovës, duke e përmbyllur kështu këtë proces të stërzgjatur për qytetarët e Kosovës.

Miratimi i liberalizimit të vizave për Kosovën nga Parlamenti Evropian u bë pa votim pasi nuk kishte asnjë kundërshtim.

Kryetarja e Parlamentit Evropian, Roberta Metsola tha se nuk ka marrë asnjë propozim për të refuzuar qëndrimin e Këshillit të BE-së për liberalizimin e vizave dhe se kanë shkuar menjëherë në votim. /Telegrafi/