Lepuri e sorkadhja në plazh për pushime

Poezi nga Nijazi Kastrati

Lepuri e sorkadhja
Në këtë vapë të madhe
Kërkonin freskinë
Te krojet në male

-A m’dëgjon moj mike
Kam dy propozime
Të ikim poshtë në lumë
A n’deti për verime

-Eh, or miku im
Kam dëshirë kah mot
Të shoh plazhin n’deti
Me fëmijë përplot

-Lepuri përpara
E sorkadhja pas
Habiten kur panë
Aq shumë fëmijë në plazh

-Ca loznin në rërë
Disa tjerë me top
Nga gëzimi sorkadhes
Sytë i rridhnin lot

-Eh sa lumturi
Kur shoh këta fëmijë
Të bukur, të dashur
Janë për mrekulli

-Së shpejti fëmijët
I morën n’përqafime
Uruan mirëseardhje
Në plazh për verime

-Lepuroshit i veshën
Një palë brekë bojëqielli
Sorkadhes së bukur
I vunë syze dielli

-Sa bukur që dukeshin
Në kostume deti
Të gjithë bënë nga’j foto
Për kujtim mes veti

-Kur përfunduan pushimet
U përshëndetën përsëri
Prap në vitin tjetër
Do të shihemi o fëmijë!