Lenjani: S`ka pazar me Karaqevën, xhandarmëria larg territorit të Kosovës

Gjilan – Selver Lenjani përfaqësues i Karaqevës është i revoltuar në Edita Tahirin dhe Hashim Thaçin. Ai thotë se derisa Edita po bisedon në Bruksel, në Kosovë po copëtohet Karaqeva. S`ka pazar me Karaqevën thotë kategorikisht Lenjani.

Jo vetëm Selver Lenjani që është njëri nga aktivistët e palodhshëm që e ka sensibilizuar problemin e Karaqevës , por edhe banorët e kësaj zone janë të revoltuar që në bisedimet e Brukselit asnjëherë nuk u kushtëzua nga delegacioni kosovar rasti i Karaqevës, raporton rajonipress.

Lenjani për rajonipress tha se ndihet i revoltuar që Edita Tahiri asnjëherë nuk e pa të udhës që ta trajtojë në këto bisedime problemin e xhandarmërisë serbe. “Ne po jetojmë përballë tytave të xhandarmërisë serbe. As pas kaq shumë bisedimesh e takimesh xhandarmëria serbe nuk ka lëvizur për asnjë milimetër, edhe pse me marrëveshjet e fundit ajo duhet të stacionohet tek shkolla e Breznicës” sqaron Lenjani.

Lenjani tha se është e pafalshme që Edita Tahiri po hesht rreth këtij problemi. “Xhandarmëria serbe ende ndodhet e stacionuar në gjashtë pika si te:”Ugari”, “Stani i Malushit”, “Rrezja”, “Quka”, “Varrezat e Spahoviqe”, dhe “Guri i Bardhë”.

“Nga këto stacionime ata rregullisht provokojnë banorët dhe fusin frikë e pasiguri. “Kareqeva mund të trazohet ose të zbrazet nëse vazhdon kështu të heshtet problemi” spikat Lenjani.

Lenjani tha se në të gjitha variantet delegacioni i Kosovës duhet të këmbëngul që xhandarmëria serbe të stacionohet rreth 800 metra larg kufirit të Kosovës e që i bije tek shkolla e Breznicës./rajonipress/