Lenjani: Institucionet e reja nuk duhet ta harrojnë Karaqevën

Gjilan – Selver Lenjani përfaqësues i fshatit Karaqevë tha për rajonipress se formimi i institucioneve të Kosovës ngjallë shpresat që problemi i Karaqevës do të marrë një epilog pozitiv në bisedimet e mëvonshme me Serbinë. Shkojë edhe viti 2014 dhe ende asnjë përparim nuk është arritur rreth kontestit kufitar thotë Lenjani.

Banorët e Karaqevës së Epërme po presin me padurim krijimin e institucioneve duke e parë këtë si një mundësi dhe zgjidhje sa më të shpejt të caktimit të vijës kufitare e cila tash e sa vite po i mbanë peng banorët e brezit kufitarë, raporton rajonipress.

Selver Lenjani përfaqësues i fshatit Karaqevë thotë për rajonipress se zvarritja e krijimit të institucioneve kosovare e ka penguar shumë edhe progresin dhe zgjidhjen e pritur nga ana e banorëve të kontestit kufitarë në mes Kosovës dhe Serbisë. “Formimi i institucioneve të Kosovës ngjallë shpresat që problemi i Karaqevës do të marrë një epilog pozitiv në bisedimet e mëvonshme me Serbinë. Shkojë edhe viti 2014 dhe ende asnjë përparim nuk është arritur rreth kontestit kufitar” thotë Lenjani.

Lenjani thotë se fatkeqësisht asnjëra qeveri apo garniturë parlamentare nuk është marrë me problemin e Karaqevës. “Jemi ankuar me qindra herë në Parlament, në Qeveri, Presidencë, polici e KFOR, por asnjëherë nuk kemi marrë përgjigje të merituar. Vërtet jemi të zhgënjyer që asnjë zyrtar i lartë kosovar nuk doli për ta parë nga afër hallin që kanë banorët e Karaqevës”.

Lenjani mendon se në bisedimet e ardhshme që pritet të zhvillohen në nivel të lartë mes Kosovës e Serbisë patjetër që duhet të trajtohet vija kufitare e sidomos lëvizja e lirë dhe e papenguar e banorëve kufitarë. “Kemi jetuar me ankth dhe nën tytat e automatikëve dhe të uniformave serbe dhe çdo ditë jemi ballafaquar me dilemën nëse ia vlen të rrezikojmë fëmijët e familjet tona. Por vendosmëria jonë ishte tepër e fuqishme dhe qëndruam stoikisht, por mos harroni se jemi lodhur” shprehet me nostalgji Lenjani./rajonipress/