Lëndohet Ajeti

“Ajeti ka dalë para kohe nga fusha e lojës si pasojë e një goditje të fortë në pulpë”, ishte shpjegimi i Torinos rreth futbollistit shqiptar i cili do të monitorohet në ditët në vazhdim.

Mbrojtësi i Kombëtare shqiptare, Arlind Ajeti, është lënduar duke braktisur shumë shpejt miqësoren që Torino ka luajtur kundër anglezëve të Hull Cityt, shkruan albinfo.ch.

Dëmtimi i Maksimoviq kishte kthyer mbrojtësin e Kombëtares shqiptare në një titullar te Torino, ku kishte shkëlqyer menjëherë me paraqitjet e tij duke marrë vlerësime nga specialistët dhe mediat italiane.

Ndaj edhe gjatë ndeshjes së fundit, Ajeti e filloi sfidën si titullar në qendër të mbrojtjes. Por në minutën e 14-të të sfidës, pas një goditje të pësuar në pulpë, ai u desh të largohej nga fusha e lojës pasi ndjente dhembje dhe nuk mund të vazhdonte më.

Dëmtimin e tij, si dhe të dy lojtarëve të tjerë gjatë ndeshjes që përfundoi 2:1 për Torinon, e konfirmoi edhe vetë klubi italian nëpërmjet një komunikate për shtyp të shpërndarë pas përfundimit të sfidës. “Ajeti ka dalë para kohe nga fusha e lojës si pasojë e një goditje të fortë në pulpë”, ishte shpjegimi i Torinos rreth futbollistit shqiptar i cili do të monitorohet në ditët në vazhdim.

Kur na ndan më pak se një muaj nga ndeshja e parë e kualifikueseve të Botërorit 2018 ndaj Maqedonisë, dëmtimi i Ajetit është një lajm aspak i mirë për trajnerin Gianni De Biasi. Mbrojtësi, që planifikohej si titullar në formacionin kuqezi në vend të Lorik Canës i cili i ka dhënë lamtumirën kombëtares, ishte futbollisti i cili kishte luajtur më rregullisht gjatë fazës përgatitore dhe vlerësohet si një nga pikat më të forta të përfaqësueses.

http://www.albinfo.ch/lendohet-ajeti/