Lekaj, thirrje pozitës të përkrahë tërheqjen e 30% nga Trusti

Opozita po insiston në kërkesën për të lejuar edhe një tërheqje tjetër nga Trusti, për këtë ata u kanë bërë thirrje deputetëve të pozitës që të përkrahin këtë iniciativë.

Deputeti i AAK-së Pal Lekaj në seancën e sotme të Kuvendit ka ripërsitur thirrjen që deputetët e pozitës ta përkrahin projektligjin për tërheqje nga Trusti, ndërsa kërkesën e tij e ka arsyetuar me rritjen e çmimeve.

“Dje në Komisionin për Buxhet u diskutua për trust. Kjo është tema aktuale ku qytetarëve u duhet 30 për qind e Trustit. Vetëvendosja ka ardhur në pushtet duke u premtuar qytetarëve jetë të dinjitetshme. Muajt e fundit po shohim se janë lodhur nga trendi i rritjes së çmimeve dhe po kërkojnë ndihmë nga dora e shtetit. Lëreni krenarinë anash dhe inatet politike. E rëndësishme është që kjo ide u ndihmon qytetarëve, u kthehet shpresa. Më të mirën mund ta bëjmë nëse lejojmë atyre të tërheqin 30 për qind të mjeteve nga Trusti”, ka thënë Lekaj në Kuvend.

Ai tha se nëse deputetët nuk veprojnë sot, qytetarët do t’i dënojnë nesër.

“Besoj janë disa gjëra që dalin mbi politikën ditore. Në emër të qytetarëve që përfaqësoj, ju bëj thirrje të përkrahni këtë projektligj për tërheqjen e 30% të Trustit. Nëse nuk veprojmë sot, populli do t’ju dënojë nesër”, shtoi Lekaj. /Zëri