Lekaj: Komentet e Osmanit për konstituimin e Kuvendit ngjasojnë me qëndrimet e LVV-së

Presidentja e Kosovës, Vjosa Osmani të martën i ka dërguar komentet e saj në Gjykatën Kushtetuese të Kosovës lidhur me ankesën e partisë më të madhe të serbëve për votimin e nënkryetarëve të Kuvendit.

E, nënkryetari i Aleancës për Ardhmërinë e Kosovës (AAK), Pal Lekaj, i ka vlerësuar komentet e Osmanit si të ngjashme me qëndrimet dhe veprimet e Lëvizjes Vetëvendosje.

Sipas Lekajt, presidentja Osmani po jep interpretime të kundërta me ato që parashikon Kushtetuta e Kosovës.

“Sot kam parë me komentet e saj që është duke folur pothuajse tërësisht Kurti apo Lëvizja Vetëvendosje. Në këtë prizmë unë shoh që qëndrimet e Osmanit ngjasonin me veprimet dhe qëndrimet e Vetëvendosjes. Për shembull e ka thënë se Kuvendi nuk mund të bllokohet për një nënkryetar, ndërsa Kushtetuta e thotë qartë dhe saktë që konstituimi i Kuvendit bëhet me zgjedhjen e kryetarit dhe pesë nënkryetarëve, kështu që mendoj se në këtë drejtim presidentja e vendit e thotë të kundërtën e asaj që e thotë Kushtetuta”, ka thënë Lekaj në Tëvë1.