Lë Shqipërinë për Francën

Artistja e re e skenës shqiptare, këngëtarja operistike Blerta Zhegu, pjesëmarrëse në shfaqje si “Elisir d’amore”, “Carmina Burana”, “Ëndrra e një nate vere”, etj, në Teatrin e Operës dhe Baletit është pranuar së fundmi pranë strukturës prestigjioze CNIPAL (Centre National d’Artistes Lyriques) në Marseille, Francë për të ndjekur një stazh lirik një vjeçar.

Sopranoja tregon se ky moment është shumë i rëndësishëm për jetën e saj artistike, ku pas disa roleve dhe interpretimeve në skenën operistike shqiptare tashmë do të jetë një tjetër pjesë e jetës artistike në Francë. “Gjatë kësaj kohe unë do të jem pjesëmarrëse si soliste në koncerte apo shfaqje të ndryshme në Teatrot e Marseille-s, Toulon-it dhe Avignon-it, së bashku me një numër të limituar këngëtarësh lirikë nga e gjithë bota”, tregon sopranoja Blerta Zhegu.

Sa i takon jetës së saj artistike në skenat e Tiranës për rolet që ka pasur deri më tani në TOB, sopranoja shqiptare vlerëson jo pak dhe rolin e Adinës në “Elisis d’amore”. “Roli i Adinës me ka dhënë një entuziazëm të veçantë, jo vetëm se është një ndër rolet e mi të preferuar, por mbi të gjitha sepse shënoi debutimin tim si artiste në TOB. U ndjeva tepër e emocionuar që publiku ynë e mirëpriti interpretimin tim”, pohon sopranoja Zhegu.