LDK thotë se ka një momentum të ri në dialogun Kosovë-Serbi, kërkon urgjentisht një dialog pozitë-opozitë

Nënkryetari i LDK-së, Lufti Haziri ka thënë se është krijuar një momentum i ri në dialogun Kosovë-Serbi, pas arritjes së marrëveshjes për dokumentet në pikë kalimet kufitare.

Përmes një postimi në Facebook, Haziri ka shkruar se “në këtë fazë duhet të ndalet retorika e luftës, retorika që sjell konflikt, sepse jo shpeshherë në proceset politike na ndodh që të krijohen rrethanat politike ku fokusi ndërkombëtar po çon drejt një zgjidhje të kërkesave që janë për njohje reciproke, pa opsion tjetër”.

Ish-kryetari i Gjilanit tha se nuk i beson Qeverisë së Kosovës në këtë proces, pasi që sipas tij nuk është e gatshme sepse ka pasiguri e mungesë kapacitetesh në përbërjen që e ka.

“Është nevojë urgjente që të zhvillohet një dialog i brendshëm për këtë me pjesëmarrje të pozitës e opozitës dhe shoqërisë civile. Krejt kjo për t’i dhënë oksigjen politik negociatorit, në interes të Republikës”, ka shkruar Haziri.

Ndryshe, kryeministri Albin Kurti nga mbledhja e përgjithshme e këshillit të LVV-së, u ka bërë thirrje tre liderëve të opozitës, Lumir Abdixhikut, Memli Krasniqit dhe Ramush Haradinajt, që të takohen me të për t’i informuar për takimin e fundit që kishte në Bruksel me presidentin serb Aleksandar Vuçiq.

Ai ka thënë se dallimet mes vete që i kanë nuk duhet të tejkalojnë interesin shtetëror e kombëtar. /Telegrafi/