LDK: Thaçi duhet të ndalet, s’ka pazare me territorin e Kosovës

Grupi Parlamentari i Lidhjes Demokratike të Kosovës, sërish ka dalë kundër presidentit Thaçi për korrigjimin e territoreve.

Përmes një postimi në rrjetin social “Facebook”, Grupi Parlamentar i LDK-së thotë se duhet të ndalet presidenti Thaçi, dhe së nuk do të lejojnë të bëhen pazare me territorin e Kosovës, përcjell “Zëri.Info”.

Ndër të tjera në këtë deklaratë për media thuhet së LDK-ja do t’i refuzojë të gjitha marrëveshjet që bëhen pa mandate të Kuvendit dhe pa pajtueshmëri.

“LDK-ja nuk do të lejojë që Thaçi dhe Vuçiq të bëjnë pazar me territorin e Kosovës.

Kosova është një dhe e pa ndashme. Territori i Kosovës nuk mund të nxirret në pazar. Presidenti Thaçi duhet të ndalet.

Presidenti Thaçi nuk ka mandat kushtetues për veprimet të tilla. Negociatat për territorin e Kosovës janë kundër kushtetuese dhe kushdo që hynë në lojëra të tilla do të bartë pasojat kushtetuese dhe politike.

Ne të bashkërendojmë veprimet në Kuvend për të penguar vënien në pikëpyetje të sovranitetit dhe integritetit territorial të Kosovës nga Presidenti i vendit.

LDK-ja do të refuzojë çdo marrëveshje që bëhet pa mandat të Kuvendit dhe pa pajtueshmëri të gjerë të forcave relevante politike dhe të qytetarëve”, thuhet në njotim./ZËRI