LDK: Pushteti aktual është vënë në shërbim të partisë, e jo të qytetarëve

Kamenicë – Dega e LDK-së në Kamenicë reagon ndaj veprime të papërgjegjshme të Pushtetit Komunal në Kamenicë e cila është orientuar në shërbim të PDK-së.

Sipas degës së LDK-së në Kamenicë drejtori komunal i Arsimit Agim Shkodra me qëllim të masovitetit të tubimit paraelektoral të kryeministrit dhe kryetarit të PDK-së i cili u mbajt të dielën më 04.05.2014, i thërret të gjithë drejtorët e shkollave të Komunës dhe prej të cilëve kërkon që të marrin pjesë në tubimin e së dielës duke i mashtruar ata se do të ketë takim pune me kryeministrin, dhe prej të cilëve kërkon që t`i ftojnë të gjithë punëtorët arsimor.

Njëjtë veproi edhe ushtruesi i drejtorit të Shtëpisë së Shëndetit në Kamenicë Rabit Dërmaku i cili punëtorët shëndetësor i fton të marrin pjesë në takim me kryetarin e Komunës. Ndërsa ftesa publike e degës së PDK-së ka qenë se do të mbahet tubim i degës së PDK-së me struktura të Degës së PDK-së thuhet në reagimin e degës së LDK-së në Kamenicë.

Kësaj ftese mashtruese nuk i shpëtuan as shërbimi i zjarrfikësve ku atyre iu tha se do të ketë takim shërbimi i zjarrëfikjes dhe policia e Kosovës me Kryeministrin Thaçi.

Disa prej këtyre të ftuarve pasi që shkuan në këtë “takim” e kuptuan se ishin të mashtruar nga eprorët e tyre u kthyen dhe nuk morën pjesë në këtë tubim partiak. Do të thotë secili mashtroi në mënyrën e vet.

Dega e LDK-së këtë veprim e konsideron si veprim të ulët politik dhe presion ndaj punëtorëve arsimor, shëndetësor dhe shërbyesve civil të cilët më së paku duhet të jenë të politizuar. Kjo dëshmon së kjo udhëheqje është vënë në shërbim të partisë e jo në shërbim të qytetarëve përfundon reagimi./rajonipress/