LDK harron marrëveshjen Thaçi-Mustafa-Pacolli

Lidhja Demokratike e Kosovës në tre muajt e fundit nuk e ka thënë asnjë fjalë për mosrespektimin e Marrëveshjes së arritur në prillin e vitit 2011 mes Hashim Thaçit, Isa Mustafës dhe Behgjet Pacollit.

Kjo parti opozitare nuk e ka mbajtur fjalën as sa i përket paralajmërimit se do të thërrasin në interpelancë Kryeministrin Hashim Thaçi për të pyetur pse nuk po e respekton marrëveshjen e arritur me ndihmën e ish-ambasadorit amerikan, Christopher Dell.

Tash, disa zyrtarët e LDK’së preferojnë të mos flasin hiq.

I pyetur se a kanë hequr dorë nga zbatimi i marrëveshjes, deputeti i LDK’së, Arben Gashi është përgjigjur duke sugjeruar të pyetet Shefi i Grupit Parlamentar Ismet Beqiri.

Gashi nuk ka dhënë përgjigje as pse nuk është thirr deri tash Kryeministri në interpelancë.

“Pyeteni Shefi i Grupit Parlamentar, ai i cakton interpelancat”, ka thënë Gashi.

Shefi i deputetëve të LDK’së nuk është përgjigjur fare thirrjeve telefonike për të treguar qëndrimin e tij në lidhje më këtë çështje.

Sidoqoftë, Nënkryetari i LDK’së, Haki Rugova ka thënë se heshtja e partisë së tij përball moszbatimit të marrëveshjes Thaci-Mustafa-Pacolli nuk është e qëllimshme.

Sipas tij, gjasat që të zbatohet diçka prej marrëveshjes janë të pakta.

“Unë nuk po shoh se ka diçka sa i përket zbatimit. Ne natyrisht se nuk do të heshtim dhe do të insistojmë që ajo të implementohet”, ka thënë Rugova, për Express, të enjten.

Ai ka thënë qysh në fillim të shtatorit do të kërkohet zbatimi i marrëveshjes si dhe do të thirret Kryeministri për raportim pse nuk po e zbaton marrëveshjen.

Por, Rugova nuk ka përgjigje pse LDK nuk e ka thirr Thaçin në Kuvend para pushimeve verore.

“Ne kemi diskutuar në organet udhëheqëse të LDK’së për interpelancën me Kryeministrin, por se çka ka ndodh më tutje në Grupin Parlamentar të LDK’së nuk e di”, ka thënë Rugova.

Ky zyrtar i LDK’së thotë edhe Lideri i kësaj partie, Isa Mustfa duhet të përgjigjet pse nuk është duke u zbatuar marrëveshja e cila ishte shndërruar në Rezolutë të Kuvendit të Kosovës.

“Kryetari Mustafa e ka nënshkruar këtë marrëveshje dhe ai është dashur të japë përgjigje”, ka thënë ai./express/