LDK e pa kënaqur me zhvillimet në arsimin gjilanas

Gjilan – Si komision i arsimit i Degës së LDK-së kemi konstatuar se edhe këtë vit, si përherë, procesin mësimor e kanë përcjellë mjaft vështirësi, defekte e probleme të natyrave të ndryshme si, rezultate të ulëta në mësimnxënie të nxënësve, numri i madh i mungesave, niveli i ulët i kodit etik dhe mirësjelljes, shkarkime dhe emërime të herë pas hershme të drejtorëve të shkollave, pagesa me vonesë e një numri të mësimdhënësve gjatë gjithë vitit mësimor, mungesë e mjeteve teknike në kabinetet e mësimit, zhvillimi i mësimit në tri ndërrime, janë vetëm disa nga një mal vështirësish që përcollën këtë vit fushën e arsimit në Komunën e Gjilanit ka thënë Nazmi Musa kryetar i komisionit të arsimit në LDK e Gjilanit.

Komisioni i Arsimit i Degës së LDK-së për Gjilan të mërkurën ka mbajtur një konferencë për medie ku ka folur mbi rezultatet e testit të maturës dhe zhvillimet rreth përfundimit të vitit shkollor 2012-2013.

Nazmi Musa kryetar i këtij komisioni tha se testi Kombëtar dhe përfundimi i vitit shkollor na shtyjnë të bëjmë një vlerësim të punës njëvjeçare të institucioneve edukativo arsimore. “MASHT-i publikoi rezultatet përfundimtare të nxënësve që iu shtruan testit të kalueshmërisë. Drejtoria e Arsimit e Komunës së Gjilanit shprehu kënaqësinë për rezultatet e maturantëve të shkollave tona. Në shikim të parë nuk kemi pse mos t’i kënaqemi të gjithë këtij rezultati, 71.58% nga 2300 maturantë të shkollave tona që iu kanë shtruar testimit të dijes së tyre” tha Musa.

Sipas tij me një analizë më të arsyeshme dhe duke u mbështetur në praktikën se si po mbahet ky testim, para se të ngazëllehemi, besoj se dëshpërohemi. “Si komision i arsimit i Degës së LDK-së kemi konstatuar se edhe këtë vit , si përherë, procesin mësimor e kanë përcjellë mjaft vështirësi, defekte e probleme të natyrave të ndryshme si : rezultate të ulëta në mësimnxënie të nxënësve, numri i madh i mungesave, niveli i ulët i kodit etik dhe mirësjelljes, shkarkime dhe emërime të herë pas hershme të drejtorëve të shkollave, pagesa me vonesë e një numri të mësimdhënësve gjatë gjithë vitit mësimor, mungesë e mjeteve teknike në kabinetet e mësimit, zhvillimi i mësimit në tri ndërrime, janë vetëm disa nga një mal vështirësish që përcollën këtë vit fushën e arsimit në Komunën e Gjilanit” shtoj Musa.

Musa tha se në rrethana të këtilla nuk ka se si të jetë një gjendje e kënaqshme e cilësisë dhe rezultateve të punës. “Lavdet e këtij pushteti se” jemi komuna më e mirë në Kosovë” rrezohen para fakteve dhe argumenteve që flasin për dështim në keqqeverisje në secilën fushë , pra edhe në fushën e arsimit” mendon Musa.

Sipas Nazmi Musës duke injoruar problemet në arsim, dhe duke mos pasur një interesim të duhur nga ana e qeverisë komunale, ende nuk është lëshuar në përdorim objekti i ri , i paraparë për nxënësit e gjimnazit , për të cilët themi se konsiderohen elita e nxënësve dhe mësimdhënësve në komunë. “Pikërisht, në mungesë të hapësirës shkollore nxënësit e gjimnazit mbajnë mësimin në tri ndërrime , në kohëzgjatje të orës mësimore 25-30 minuta. Edhe tani nuk jemi të sigurt se ky objekt do të jetë i gatshëm për punë në shtatorin e këtij viti , në mënyrë që nxënësit e Gjimnazit të kenë mundësi t’i ndjekin mësimet në dy ndërrime” tha ai.

Sipas Musës jo zyrtarisht , qarkullojnë thash e thëne se ky objekt nuk do të jetë në shërbim të nxënësve të Gjimnazit, por do të jetë objekt i Universitetit Publik të Gjilanit i cili pritet të pranojë studentë të rinj në tetorin e këtij viti. Kjo do të vërtetohet në fillim të vitit mësimor. “Veç tjerash, hapësira rreth këtij objekti , më saktësisht prona e drejtorisë së pyjeve për komunën e Gjilanit, kërcënohet nga AKP-ja e cila synon ta nxjerr në ankand publik për privatizim, duke e ngushtuar në maksimum hapësirën e nevojshme për nxënës të kësaj shkolle dhe shkollave tjera në afërsi. Komisioni i Arsimit i Degës së LDK-së kërkon nga kryetari i Komunës, Qemajl Mustafa, që një projekt të këtillë mos ta lejojë në asnjë mënyrë./rajonipress/