Lazio sytë kah Mavraj

Mërgim Mavraj mbetet një pikë referimi në blerjet e reja të Lazios. Sipas roma.repubblica.it, emergjenca që po has trajneri, Stefano Pioli, në repartin mbrojtës ka vënë në lëvizje drejtorin sportiv, Igli Tare, për të gjetur me patjetër të paktën një qendërmbrojtës me peshë për në afatin kalimtar të janarit, transmeton Telegrafi.

Për momentin Tare ka nisur kontaktet për të marrë nga Sparta Moska Boketin, por kartoni i tij është 5.5 milionë euro. Ndërkohë në kahun tjetër shqiptari vijon bisedimet edhe me klubin e Bazelit për Fabian Schar, lojtar që i përfundon kontrata në fund të këtij sezoni dhe nuk ka rinovuar ende.

Qendërmbrojtësi i Kombëtares shqiptare ishte dhe vjet në “orbitën” e klubit italian, por çuditërisht Tare nuk e afroi, pavarësisht se bëhej fjalë për një lojtar me parametër zero (tashmë luan te Kolni në Bundesligë).

Fakti se Mavraj po tregon një formë të shkëlqyer ka bërë që Lazio të rimendojë për këtë të fundit, pavarësisht se tanimë do të duhet të paguajë të paktën 3 milionë euro për kartonin e tij. /Telegrafi/