Lajçak reagon pas marrëveshjes: E falënderoj Escobarin dhe diplomacinë amerikane

Përfaqësuesi i Lartë i Bashkimit Evropian për Politikë të Jashtme dhe Siguri, Josep Borrell, ka njoftuar se është arritur marrëveshja mes Kosovës e Serbisë për letërnjoftimet.

E këtë zhvillim e ka përshëndetur edhe përfaqësuesi i posaçëm i Bashkimit Evropian në dialogun Kosovë-Serbi, Mirosllav Lajçak.

Ai me këtë rast ka falënderuar emisarin e SHBA-së për Ballkanin Perëndimor, Gabriel Escobar dhe diplomacinë amerikane për ndihmën e ofruar.

“Falenderoj emisarin e SHBA-së për Ballkanin Perëndimor Escobar dhe diplomacinë amerikane për angazhimin e tyre të fortë në mbështetje të dialogut të lehtësuar nga Bashkimi Evropian”, ka shkruar Lajçak.

Një ditë më parë i dërguari amerikan për Ballkanin Perëndimor, Gabriel Escobar tha se palët duhet të zbatojnë të gjitha marrëveshjet e deritashme.

Diplomati amerikan i cili bashkë më diplomatin evropian Lajçak qëndroi në Kosovë dhe Serbi në përpjekje për të gjetur një zgjidhje që do të shmangte tensionet në terren, tha se bisedimet janë mekanizmi nëpërmjet të cilit të dyja vendet mund të normalizojnë marrëdhëniet ndërmjet tyre dhe të hapin ardhmërinë evropiane./Telegrafi/