Emisari i Bashkimit Evropian për dialogun Kosovë-Serbi, Miroslav Lajçak, pas takimeve me krerët opozitarë në Kosovë, tha se i ka informuar ata në detaje për planin e BE-së për dialogun.
Para mediave, Lajçak deklaroi se nuk është i shqetësuar nëse partitë politike opozitare do t’i thonë jo marrëveshjes. Ai madje u shpreh optimist se ato nuk do ta bëjnë një gjë të tillë.
“Mendoj se është e rëndësishme në këtë pikë për mua të takohem me partitë opozitare, dhe jam takuar me PDK-në, LDK-në dhe AAK-në dhe i kam njoftuar për procesin, për pritjet e bashkësisë ndërkombëtare. Ata kanë shpjeguar qëndrimin e partive të tyre. Pra, e gjitha është pjesë e përgatitjes për takimin e datës 18. Mendoj që është shumë e rëndësishme që edhe ata të dëgjojnë nga unë, dhe jo vetëm nga media apo nga Kuvendi, prandaj për mua këto takime kanë përmbushur qëllimin”, tha ai.
Lajçak po qëndron në Kosovë që nga dita e djeshme, ku edhe ka takuar krerët e shtetit./Telegrafi/
