Kuvendi, vetëm 19 për qind aktiv

Kuvendit të Kosovës i ka mbetur edhe një muaj deri në përfundim të sesionit pranveror, por përmbushja e agjendës legjislative vazhdon të jetë larg synimeve. Sipas platformës për monitorimin e Kuvendit “Vota Ime”, Kuvendi ka realizuar vetëm 19 për qind të agjendës legjislative, kur ka mbetur edhe një muaj deri në përfundim të sesionit pranveror.

Deputetët dhe monitoruesit e Kuvendit kanë kritika për mbajtjen e seancave të rralla që po mbahen. Edhe monitoruesit e punës së legjislativit kanë kritika për humbjen e dinamikës së nevojshme të punës nga organi më i lartë ligjvënës.

As këtë javë Kuvendi nuk do të zhvillojë seancë plenare, pavarësisht se një numër i projektligjeve është duke pritur për shqyrtim.

LEXO EDHE: Deputetët e Kosovës 2000 euro pagë – të Serbisë 840 euro

Sekretari i Kuvendit të Kosovës, Ismet Krasniqi, ka thënë për “Zërin” se për seancën e radhës momentalisht janë të gatshëm për shqyrtim “Shqyrtimi i dytë i Projektligjit për Investimet Strategjike në Republikën e Kosovës, Shqyrtimi i Raportit të Radiotelevizionit të Kosovës për vitin 2015, Shqyrtimi i Raportit të Zyrës së Rregullatorit për Energji për vitin 2015 dhe Emërimi i anëtarit të Këshillit Drejtues të Institutit Gjyqësor të Kosovës, ndërsa 20 projektligje të tjera janë në procedurë. 5 projektligje presin për shqyrtim të parë, pas shqyrtimit në parim nga komisioni funksional. Një Projektligj për ratifikim të Marrëveshjes Ndërkombëtare ende nuk i plotëson kushtet për procedim në seancë plenare (është proceduar në Kuvend më 21.06.2016), derisa janë 14 projektligje në procedurën e shqyrtimit në komisionet funksionale”, ka thënë Krasniqi./zeri/