Kuvendi s’duhet ta votojë këtë version të buxhetit

Ish-ministri i Ekonomisë dhe Financave, Haki Shatri, është shprehur i pakënaqur me Projektbuxhetin e vitit 2017.

Ai u ka bërë thirrje deputetëve të Kuvendit të Kosovës të mos e votojnë këtë version të buxhetit pasi, sipas tij, ka shumë mangësi. “Projektligji për Buxhetin e vitit 2017 ka shumë mangësi materiale dhe, si i tillë, nuk duhet të votohet nga deputetët”, ka thënë Shatri.

Në këtë intervistë dhënë për gazetën “Epoka e re”, Shatri ka thënë se koalicioni qeverisës është duke e mashtruar opinionin, meqë vlera e buxhetit nuk është dy miliardë, por një miliard e 730 milionë euro, aq sa janë të hyrat burimore.

Ai ka thënë se kreditë nuk janë kategori buxhetore. Ish-ministri Shatri nuk sheh prishje të koalicionit qeverisës si shkak i këtij buxheti, por thotë se ndonjëra parti mund të ngulë këmbë te buxheti, pasi mund t’i konvenojë shkuarja në zgjedhje.