Kuvendi Komunal i Kamenicës miraton me shumicë votash vendime të rëndësishme për pronat, buxhetin dhe projektet zhvillimore

Kamenicë – Kuvendi Komunal i Kamenicës ka mbajtur mbledhjen e pestë të rregullt, në të cilën janë shqyrtuar dhe miratuar një sërë pikash me rëndësi për funksionimin institucional dhe zhvillimin e projekteve komunale.

Mbledhjen e hapi kryesuesja e Kuvendit Komunal, Arbnore Beqiraj-Fera, ndërsa të pranishëm ishin kryetari i komunës Kadri Rahimaj, nënkryetarja Arta Bajralija, asambleistët komunalë, drejtorët e drejtorive komunale, përfaqësues të organizatave joqeveritare dhe qytetarë të interesuar.

Në këtë mbledhje u shqyrtuan disa pika të rëndësishme të rendit të ditës, përfshirë aprovimin e procesverbalit nga mbledhja e kaluar, pyetjet e legjislativit drejtuar ekzekutivit, si dhe propozim-vendimet që lidhen me dhënien në shfrytëzim të pronës së paluajtshme komunale dhe formimin e komisioneve përkatëse për vlerësimin e ofertave.

Po ashtu, Kuvendi shqyrtoi dhe miratoi raportet e Komisionit Komunal për vlerësimin e dëmeve të shkaktuara nga fatkeqësitë natyrore dhe fatkeqësitë tjera, si dhe Draft-planin Komunal për Ri-integrimin e Qëndrueshëm të Personave të Riatdhesuar dhe Integrimin e të Huajve në Komunën e Kamenicës për periudhën 2026-2028.

Gjatë mbledhjes, kryetari Kadri Rahimaj paraqiti edhe dy propozime shtesë për t’u futur në rend dite, përkatësisht:

bartjen e mjeteve nga të hyrat vetanake të vitit 2025 në vitin 2026,
si dhe propozim-vendimin për buxhetimin e bashkëfinancimit dhe krijimin e kodit të ri për projektin “Kolektori i ujërave atmosferikë”, në bashkëpunim ndërmjet Komunës së Kamenicës dhe kompanisë “M&B Company” SH.P.K.

Pas diskutimeve dhe debatit nga asambleistët, të gjitha pikat e rendit të ditës u miratuan me shumicë votash, duke i hapur rrugë realizimit të projekteve dhe proceseve të rëndësishme për qytetarët e komunës së Kamenicës./rajonipress/