Kushtetuesja: Thaçi, president legjitim

Gjykata Kushtetuese e ka shpallur të papranueshme ankesën e opozitës kinse Hashim Thaçi është zgjedhur president i Kosovës në mënyrë jokushtetuese më 26 shkurt të këtij viti.

Kushtetuesja ka refuzuar kërkesën për masë të përkohshme dhe për dëgjim publik, duke ua kumtuar kështu vendimin e saj të gjitha palëve duke treguar se ky vendim hyn në fuqi menjëherë.

Në bazë të këtij aktgjykimi presidenti i zgjedhur, Hashim Thaçi, është president legjitim i Kosovës dhe inaugurimi i tij pritet të bëhet ashtu edhe siç ishte planifikuar.

LVV: Gjykata, e ndikuar politikisht

Mirëpo, i menjëhershëm ka qenë reagimi i partive opozitare. Ato kanë thënë se Kushtetuesja nuk e ka për bazë drejtësinë, por interesin e politikanëve në pushtet.

“Gjykata as kësaj radhe nuk u mor me substancën, me faktet dhe argumentet që përmbante kërkesa. Po të ishte marrë me trajtimin e substancës, pashmangshëm nuk do të mundë ta shpallte si të ligjshme zgjedhjen e Thaçit president”, thuhet në reagimin që Lëvizja “Vetëvendosje” ka lëshuar për medie. Madje, “Vetëvendosja” akuzon këtë Gjykatë se edhe ky vendim ka qenë i ndikuar politikisht./zeri/