Gjilan – Agron Tufa është poet modest. Modestia e tij vërehet kudo: nuk flet shumë, fjala e tij zë vend në çdo kuvend, nuk krekoset, por është “tip” që secili ia ka për lakmi jetës së tij. Mandej, ai me secilin njeri përshëndetet dhe, buza e tij është gjithnjë në gaz. Pse jo? I shkëlqen nuri. Pas Orës së madhe letrare të “Flakës…”. dëshiruam të zhvillojmë një bisedë të shkurtër për lexuesit. E patëm shkasin se ai ishte fitues i Orës së madhe letrare për poezi.
Agron Tufa, pos tjerash, është studiues e dr. shkencash. Por ai është edhe krijues e profesor pranë Universitetit Shtetëror të Tiranës. Ai, pa hezitim, na u përgjigj pyetjeve tona dhe tha me pak fjalë jetën e tij se është adhurues i madhe librave, gazetave, manifestimeve kulturore, por edhe i jetës studimore e shkencore etj. Kjo “jetë” e tij është një lloj “zeje”, e cila të fut nga brenda dhe nuk mund ta dalësh nga ajo. Jo vetëm kjo.
Agron Tufa është i lindur, më 1 prill 1967 në Dibër. Studioi në Fakultetin Filologjik të Tiranës e më pas në Institutin Gorki në Moskë (1994 -1999). Pas diplomimit atje, ndoqi edhe programin e masterit për filozofi arti në Institutin e Kulturave Europiane IEK (1999 – 2001). Është profesor i Letërsisë së huaj të shekullit XX në Fakultetin Filologjik të Tiranës. Mban titullin doktor i Shkencave Filologjike.
Krijimtaria e letrare e tij është një thesar i shumtë. Shih për këtë, ai është nderuar me çmime të rëndësishme kombëtare e ndërkombëtare dhe vepra e tij është përkthyer në disa gjuhë të botës. Para pak vitesh, ai është shpallur si autor më i mirë i vitit për vëllimin poetik “Kafsha dhe Fantazma”, botuar nga Onufri duke evidentuar tharmin krijues të autorëve shqiptare në këtë gjini dhe rikthimin e vëmendjes së lexuesit tek poezia. Jo vetëm kaq.
Agron Tufa, krijues e profesor, shpallet edhe autori i vitit për krijimtari letrare artistike. Ai merret edhe me përkthime dhe, si përkthyes më i mirë u shpall me romanin: “Dru qershie dhe ndjenja të vjetra” e autores Mariza Bozrovic, shqipëruar nga Edvin Cami botuar nga Dituria. Ky autori, gjer më tani ka botuar këto vepra letrare artistike, si janë: “Aty te portat Skee”, poezi, Onufri, 1996; “Dueli”, roman, “Ora”, 2002, (ribotim “Fjala”, 2007); “Rrethinat e Atlantidës”, poezi, Aleph 2002; “Fabula Rasa”, roman, Ideart 2004, “Janusi qindfytyrësh”, ese, Pro-Kultura, Tetovë, 2004; “La Prueba della tierra”, poezi, bashkautor, Maremoto, Spanjë 2005; “Mërkuna e Zezë”, roman, Toena 2005 (ribotim, Toena 2009); “Avangardë engjëjsh”, poezi, Ideart 2005; “Fryma mbi ujëra”, poezi, “Fjala” 2007; “Nove poesie” – “La stanza del poeta”, Formia, Itali 2008; “Dibra me sytë e të huajve”, MB botime, Tiranë 2008; “Letërsia dhe procesi letrar në shekullin XX”, vol I, II, SHBLU, 2008-’09; “Thembra e Akcilit”, miniatura, Zambak, Tiranë 2009; “Tenxherja”, roman, Toena, Tiranë 2009 e disa të tjera.
I pyetur se a bashkëpunon me revista e gazeta, ai u përgjigj me plot gojë se, bashkëpunon me disa gazeta dhe revista aktuale. “Karrierën time e kam filluar si gazetar, mandej si letrar. Ja kjo “jetë”, gazetaria më pëlqen dhe më ka lënë gjurmë të pashlyera n jetën time. E dua gazetarinë, sepse është një “tjetër” jetë nga fusha letrare. Por, kur ia bëmë një pyetje, se si e vlerëson manifestimin e “Flakës së Janarit” në Gjilan, ai tha se është jashtëzakonisht fushë e dobishme për të mos thënë se ka vlera që joshin lexuesin dhe shton interesimin e secilit adhurues të fjalës së bukur.
“Eshë njomëse përherë, por edhe edukative me një lloj tematike relativisht e supozuar. Jam krejt i befasuar nga ky eveniment kulturor, sepse nga kur njoha kalendarin e aktiviteteve që ka filluar “Flaka … “ në këtë qytet të bukur të Kosovës, kjo është rezistenca më e lartë në fushën më të djeshme të kulturës sonë. Është një kulturë që nuk e ka asnjë qytet i meseve tona, është një gamë që ka komplekse aktivitetesh. Kjo ka qenë befasia ime më e ndjeshme dhe e papritur. Gjilani po tregon se posedon vlera të të pakontestueshme të kulturës, të cilat po i shpalos dhe po i “relakson” artdashësit me shumë të arrira kulturore”, shtoi në fund të bisedës. A.Tufa, poet nga Tirana./tefik selimi/rajonipress/
